Ик Буурл селәнд олн патьрта гермүдт федеральн программар ясвр кегджәнә
Ик Буурла районд әмтн бәәдг гермүд яслһна төлә нәәмн сай арслнг йовулгдхмн. Федеральн программар ода арвн долан герт иим сән ясвр кегдв. Иим ик дааврта көдлмшиг сән чинртәһәр кех зура тосхачнр тәвжәнә.
Бәәрн әмтн ик байрта бәәнә. Өдр ирвәс эднә гер кеерәд, сәәхрәд йовна. Хойр долан хонг хооран эднә гер йир му дүрстә билә. Энүнә тускар әмтн келхәр седхш. Герин терзмүд хуучрад өмкрад, унх әәмшгтә билә, энд-тенд эрст шуурха болн нүкн үзгддг бәәсмн, герин ул бас хуучрв, хурин хөөн усн һоодан подвалд гүүж ордг билә. Лидия Бембееван келсәр, эднә герин өөр бәәх талдан гер һурвн жил хооран капитальн ясврт орх программд тусв. Тегәд эдн иим программд гернь орх гиж нәәлжәлә. Лидия Бембееван келсәр, ик кезәнәс авн күләжәсн ясвр эклв. Ик байрта бәәнә.
Тер мет Татьяна Салмаева бас ик байрта бәәнә. Эднә гер федеральн программд орсн тускар сонсчкад, эврәннь патьртан бас ясвр кехәр шиидв. Пластикин терз хулдж авч, дула өгдг шин систем авв. Ода талда улсла әдл сәәнәр бәәхвидн гиж келнә. Татьяна Салмаеван келсәр, ода шалдарин көдлмш төгсв, патьрини орад бас шинрүлх саната. Шин герт бәәснлә әдл бәәх цаг ирв.
Эн жил Ик Буурл селәнд хойр давхрта дөрвн герт капитальн ясвр кегдхмн. Ода хйор герт ясврин көдлмш гүргүдән. Хамгин һол кергнь — цагалнь кергтә цаас белдәд, мөнгн мел дигтә кемлә ирв. Ода район эн туст нәәмн сай арслнг олзлх зөвтә. Темдглсн зура ода деерән күцәгджәнә. Залврин компаня һардач Юрий Сагаевин келсәр, хамгин түрүнд герин ул батрулх төр тәвгдв. Сагаевин темлглсәр, хамгин түрүд цоколь кех шиидвр авгдла. талдан чигн кергтә тосхлтын көдлмш кегдв.
Энүнә хөөн герин дотр инженерн коммуникац сольх цуг көдлмш эклв. Тер мет энүнлә зерг электрокүчнә суннһуг бас сольгджана. Дәкәд болхла герин подьездмуд шинрүлгдх. Энд шалдарин, ширдлһнә болн цаһалһна көдмш кегдх зура бәәнә. Пластикин шин терз углж тәвгдх. Зәрм подьездмудт шин лампочкс тәвгдв, ясврин көдмш төгсхлә, энд төмр шин үүдн бас углж тәвгдхмн. Тосхач Валентина Цагаеван келсәр, одад деерән тосхлтын материал цаглань авч иргджәнә. Тегәд чигн ясврин көдмш темдглсн зураһар кегджәнә.
Обьект бүрткжәх района муниципальн бүрдәцин специалистнрин келсәр, долан жил хооран олн давхрта гермүдт орань шинрүлгдв. Тиигхд района бюджетас мөнг йилһж өгв. Тегәд чигн эн көдмш түргн йовудтаһар күцәгдв. Федеральн программ экләд орлцснас авн района цутхлнг селәнд олн патьрта арвн долан герт сән ясврин көдлмш кегдв. Шин программин нилчәр, цуг гермүдт дула өглһнә систем углж тәвгдв. Ик-Буурла района муниципальн бүрдәцин администрацин толһачин дарук Александр Владимировин келсәр, эн жил мөнгн эрт ирв. Тегәд ясврин көдлмш июлин эклцәр кех арһ учрв. Дөрвн герт августын нег шин күртл цуг ясврин көдлмш төгсх.
Иим дааврта болн ик чинртә көдлмшиг цаглань кесн деерән, капитальн ясвриг сән чинртәһәр кех кергтә болжана. Иим зура бәәрн района һардвр темдглж авсмн.
Чучян Валентина, Хулхачин Николай
