Яшкульск районд бичкдүд хальмг кел сәәнәр дасжана

Танһчин школмудт хальмг кел дасхлһна төр шин девнгд оржана. Төрскн келән сурһульчнр негдгч классас авн дасна. Хальмг кел хадһлж босхлһна төриг Яшкульск районд сәәнәр хаһлжана.

Зурһадгч классин сурһульч Светлана Бабенко олн үртә өрк-бүлд һурвдгч үрн. Эднә өрк-бүлд нәәмн бичкдүд өсжәнә. Яшкульск дундын школын багшнр Светланаһар бахмж кежәнә. Хальмг кел түрүн болж негдгч класст экләд дассна хөөн, хальмг улсин хурц болн олмһа кел дурлв. Ода иргчдән ямаран эрдмәр көдлхән шүүһәд авчкв.

Яшкульск школын зурһадгч классин сурһульч Светлана Бабенко келсәр, өсхләрн хальмг келнә багш болх саната.

Яшкуль селәнд халмьг келн босхгджахнь ил үзгднә. Олна һазрт хальмг келәр зар бичгдж, әмтн хоорндан нег-негән төрскн келәрн күндлж мендлнә, йөрәл келнә.

Яшкульск дундын школд хальмг кел сурһульчнрт негдгч классас авн дасхна. Иим дамшлт танһчин цуг школмудт олзлжана. Нег үлү, хальмг кел школд хальмгудла зерг талдан келн-улсин бичкдүд бас дасжана.

Багшнрин келсәр, урднь бичкдүд болн ах классин сурһульчнр хоорндан хальмг келәр күүндж чаддго бәәсмн. Тегәд төрскн кел дасхлһна программ әдләр эклдг билә.

Яшкульск школын хальмг келнә багш Марина Надбитован келсәр, школан төгсәсн баһчуд талдан һазрас багшнрт хальмг келәр смс зәнг йовулна. Эдн багшнриг хальмг келәр йөрәнә, үлгрүнмүд бичнә. Энүнд багшнрин ач-тус бәәхнь лавта.

Төрскн келән меддг эк-эцкнр, ээж-аавнр бичкдүдт эврәннь медрлән өгх зөвтә. Тегәд хальмг келнә баншнр эднәс дөн суржана. Хамгин түрүнд эк-эцкнр, ээж-аавнр гертән бичкдүдлә күүндәд, школдж авсн медрлән батрулхд нөкд болх зөвтә. Тер мет эк-эцкнр сурһулин кергт бас орлцад, дөн күргхлә сән болх.

Хавтхна Элла, Котина Валерий