Деед сурһулин оютнр сән үзмж бәрв
Хальмгин университетин оютнрин төсв федералдьн кемжән өөдәнәр үнлгдв. Эднә номин болн социальн көдлмш Санкт-Петербург балһснд болсн цугәрәсн оютнрин форумд үзүлгдв. Энүнд дөрвн зун тәвн Әрәсән деед сурһулин күсдундур минһн баһчуд орлцв. Энүнә тускар пресс-конференцд ректор Бадм Салаев зәнглв.
Эн жил форум һурвн девснгәр болв. Региональн девснгд диилвр бәрсн улс шүүврин марһанд орлцх зөв авв. Энүнә ашар хамгин әсн төсвин зокьялчнр цугәрәсән форумин федеральн девснгд орлцв. Санкт-Петербург балһснд цуглрсн күсдундур минһн орлцач дунд Хальмгин университетин оютнр бас дөрлдв. Тер тоод Иван Горяев, Альмина Комолова болн Алина Манджиева. Алина Манджиеван социальн төсвин нернь — “Обшежить — хойрдгч гер” нерәдлһтә. Иим төсв шүүж авснь бас учрта. Алина обшежитьд һурвн жилдән бәәнә. Тегәд обшежитин цуг төрмүдиг сәәнәр меднә. Талдан көвүд-күүкдлә хамдан сурһулин болн дамшлтын хора бүрдәлһнә зура темдглж авч. Энүг күцәхин төлә деед сурһуль далн минһн арслнг йилһж өгв.
Алина Манджиеван келсәр, хора һурвн әнгд хувагдв. Негдгч әнгд компьютермуд, ксерокс, принтер бәәнә. Энүнд герин көдлмшән кеж болх. Хойрдгч әнгд хамгин әсн көдлмш тәвгдв. Һурвдгч әнгд оютнр цуглрад хоорндан хәрлцж чадх. Обшежитьд һазадын ордудын оютнр бәәнә. Амрлһна өдрмүдт хамдан цуглрад кинофильм хәләж болх.
Форумин йовудт твн зөрүлтәр дегд кесг плошадкт көдлмш бүрдәгдв. Энүнд баһ наста номтнр эврәннь шинжлтән харсв. Тер мет арһлачнрин делрглтин төлә инновационн төсв белдв. Форумин йовудт талдан чигн төрмүд хәләгдв. Ректор Бадм Салаевин келсәр, иим форумд көвүд-күүкд шин төсвән федеральн кемжәнд үзүлх арһ учрна.
Ректор Бадм Салаевин келсәр, Горяев Иван магистратурт сурчана. Түрүн жил сурчана. Энүнә төсв ик ичнртә. Энүнд номтнр оньган тусхав. Комолова Альмина малын идгин бәәдлин туск төр шинжлв. Зуг орулж өгсн дөрвн зун тәвн төсв нег банкд орулгдх. Энүг оютнр цаарандан күцәх.
Алина Манджиеван келсәр, йосна органмудын элчнр, арһлачнр, шинжләчнр болн Әрәсән шунмһа баһчуд орлцата иим форумд орлцлһн ик чинр зүүсн деерән, дааврта керг болв. Энүнә тоолврар, хальмгин университетд хоршасн дамшлт федеральн кемжән төсәвн харсхд сән нилчән күргв.
Алина Манджиеван келсәр, иргч жилд марһанд орлцх төсв белдхин төлә нөкд болх зура бәәнә. Эдн марһанд диилвр бәрх зөвтә.
ВЗК: Форумин ашар энүнд орлцачнр федеральн реестрт орулгдлх. Эдн мана орн-нутгин экономикин кадрин көрнг болх. Тер мет форумин йовудт Әрәсән хамгин сән деед сурһуль заагдв. Зун тәвн дөрвн деед сурһуляс комиссь арвн зурһан университет шүүж авв. Тер тоод Хальмгин государственн университет йовна.
Ээнән Ольга, Котина Валерий
