Яшалтинск района Веселовск СМО-д бичкдүдин сад секхинь бәәрн улс ик гидгәр күләжәнә
Яшалтинск района Веселовск селәнә муниципальн бүрдәцд бичкдүдин сад секхинь бәәрн улс ик гидгәр күләжәнә. Сүл хөрн жилд селәнд бичкдүд садт орж чадсн уга. Ода Веселое селәнд долан нас күрәд уга хөрн долан көвүд-күүкд бәәнә. Нег сар болад бичкдүдин сад экләд көдлх. Тосхлтд селәнә бәәрн әмтн эврә дурар нөкд болжана.
Назар Агафонов эктәһән тас салхш. Экнь альдаран йовв чигн, ардаснь дахна. Виктория экнь ода көдлжәнә. Тегәд көвүһән үлдәдг һазр уга болна. Селәнд удл уга бичкдүдин сад секхинь сонсчкад, Агафонова ик гидгәр байрлжана. Ода ууһн күүкнь герин даалһвран санамр кеж чадх, ээж-аавнь амрч чадхмн. Бичкн Назар болхла өдр болһн гилтә бичкдүдин садын тосхлт одад хәләнә.Энүг секхинь тенкән уга гидгәр күләжәнә.
Назар болн селәнә дәкәд хөрн зурһан көвүд-күүкд бичкдүдин сад секхинь күләжәнә. Дошкольн учрежденьд нәәмн хора бәәнә. Сад секхин төлә ирлцнһү гер хәәж авх кергтә болв. Тер бийнь селәнә әмтн байрта бәәнә. Виктория Агафонова келсәр, садикт одсн күүкд гертә өссн көвүд-күүдәс йилһрнә. Хөөннь школд одхла, садикин бичкдүдт невчк амр болна. Талдан көвүд-күүдлә наадад дасчкна.
Бургшн селән бичкн. Энүнд ода зуг тавн зун найн күн бәәршлжәнә.Сүл хөрн жилдән селәнд бичкдүдин сад көдлсн уга. Кесг бичкдүд дошкольн сурһуль авч чадсн уга . Сүл цагт селәнә көдләчнрин хоршасн оруһас мөнгн социальн халхд йилһж өггдг болв. Тегәд чигн Веселовск СМО болн Бургшн СПК һардвр района ахлачнрин дөнгәр бичкдүдин сад секхәр шиидв. Бургшн СПК ахлач Иосиф Зосимовин келсәр, района муниципальн бүрдәцин һардвр садикт мебель хулдж өгх. Бидн болхла эврәннь чидләрн дула өгдг систем орулвидн. Бичкдүдин сад секгдхлә, белгән авч ирхвидн. Мана СПК көдләчнрин бичкдүд садикт орхла, маднд бас олз-туста болх.
Веселовск СМО һардач Ирина Кушнареван келсәр, бичкдүдин садын тосхлтд района бюджетас һурвн зун минһн арслнг ирв.Эн мөнгәр садын гер шинрүлж ясгдв, герин дотрк цаһалгдж ширдгдв, шин терз-үүд тәвләвидн. Бичкддүин төлә гер дотр туалет кеж чадвидн. Садын тосхлтд селәнә бәәрн улс ик нөкд болв. Өрк-бүләрн ирәд, энд көдлв. Веселовск СМО һардач Ирина Кушнареван келсәр, селәнә улс эврә дурар ирәд нөкд болв. Ода бичкдүдинс адт кергтә оборудовань хулдж авх кергтә.Энүнә төлә нег сай арслнг һарх.
Тер мет бичкдүдин садын тосхлтыг танһчин һардачнр бүрткжәнә. Хальмг танһчин олн-әмтнә хуралын ахлач Анатолий Козачко нааран ирәд, тосхлтын йовудар соньмсв. Селәнд талдан чигн кергтә таал әмтн бүрдәгдх гиж эн темдглв. Дошкольн учрежденя эргндк аһу ик биш. Тегәд бичкдүд селәнә паркд наадж чадх. Энд дүүжнг кегдв.фонтан ясгджана, цецгүд тәргдв. Бичкдүдин сад нег сар болад секгдх. Үвл эклтл дошкольн учрежденьд көвүд-күүкд ирәд, школд белдвр кех.
Гюзелян Татьяна, Очра Сергей
