Уйн наста цергчнр шүүвр өгв

“Юный десантник” нертә спортын болн төрскнч клубын орлцачнр десантн цергин хувц өмсх зөв авцхав. Бичкн көвүд цуг амр биш даалһвр күцәж чадв.

Нәәмдгч классин сурһульч Данзн Окняев клуб секснә түрүн өдрәс авн энд сурчана. Эн цагин эргцд дала соньн медрл авч чадв гиж эн келнә. Данзн спортд йир дурта көвүн. Урднь каратэн секцд оржала. Өсхләрн эрк биш цергә халхар көдлх санан бәәнә. “Юный десантник” нертә клубын гешүн Данзн Окняевин келсәр, клубын гешүд чанһ-чиирг болхин төлә цуг арһ-чидлән агсж көдлнә.

Леша Резниченко бас цергә эрдм шүүж авв. Иим клуб секхин тускар эцкәсн сонсад, тер даурнь десантникүдин клубын ханьд орхар шиидв. Энүг дахад хамдан сурчасн көвүд клубд бас орв. Клубын гешүн Леша Резниченко келсәр, клубын тренер цергә эрдм дасхна, ноолдана эв-арһ бас дасхжана. Иргчдән Рязанск училишд орх саната.

Наркоконтролин церглтин болн Хальмгин десантникүдин ниицәнә седвәрәр давсн жилин февраль сард клуб бүрдәгдсмн. Клубын трнере-һрадач Бембә Боджаев кичәл болһнд көвүдт баатр-зөрмг болхин төлә болн төрскнч сурһмж өгхин төлә чидлән әрвллго шунж көдлжәнә.

Хальмгин десантникүдин ниицәнә ахлач Очр Халгаевин келсәр, сурһулян мууһар сурчасн көвүд, ода сурһульдан сән үзмж бәржәнә. Кичәлин өмн тренер эднә дневник хәләнә. Бембә Валерьевич школмудар йовад, эднә көвүд яһж сурчахин тускар соньмсв. Энүнә хөөн көвүдлә күүндвр кенә.

Эн өдр орсн хур болн салькн уйн наста курсантриг зогсаж чадсн уга. Эдн цуг өгсн даалһвриг күцәж чадв. Келхд, клубын хамгин бичкн орлцач зуг нәәмн наста. Астраханск областяр Әрәсән нарконтролин церглтин региональн заллтин ахлачин дарук Андрей Ивенский келсәр, наркоконтролин церглтин улд бичкдүд цергә эрдм дасжана. Энд сурчах көвүд аля-азд көөхш, эднд сул цаг күртхш.

“Юный десантник” клубын ханьд жилин эргцд орж болх. Церглтин ветеранмудын келсәр, клубд орхар олн көвүн ирнә, зуг хамгин чанһ-чииргнь үлднә. Эндр болсн шүүврин йовудт багшнр дасхсн цуг дамшлтыг көвүд үзүлж чадв. Эднд байрин бәәдлд көк беретмуд бәрүлж өггдв.

Шаран Баира, Хавтхна Анатолий