Төрскән харсгч дәәнә орлцачнрт нерәдгдсн мемориальн самбр секгдв
Төрскән харсгч дәәнә орлцачнрт болн тылын көдләчнрт нерәдгдсн мемориальн самбр секлһнә митинг Аршань поселкд болв. Энүнд дәәнә ветеранмуд, танһчин министерствсин-ведомствсин элчнр орлцв.
Эн жил Элст балһсиг немшнрәс сулһдхсна далн жилин өөн күцв. Сүрк болн кесг цагтан болсн дәәлдәнд советск цергин салдснр баатр-зөрмгән үзүләд, цус-махан асхад, төрскн һазран хортнас харсж авсмн. Тер тоод хөрн нәәмдгч әәрмин ветеран Андрей Манганыкович Джимбиев хотл балһсиг сулдхсмн. Ода Элст балһсиг немшәс сулдхсн цергчнрәс ор һанцхарн үлдв. Тегәд чигн төрскән харсгч дәәнә орлцачнрт эн һазра улст нерәдгдсн мемориальн самбриг секх зөв ветеран Джимбиевд өггдв.
Дәәнә ветерана келсәр, иим керг-үүлдврмүдт орлцад, дорас өсж йовх баһчудт тер сүркә дәәнә тускар, өвкнрин баатр-зөрмг йовдлын тускар, диилвр ямаран үнәр күртсн тускар келж өгнә. Бичкдүд энүнә тускар медх зөвтә. Мемориальн самбр секлһн көдлмшин түрүн девснг болжана. Энүг кехин төлә өрхл жил кергтә болв. Арвн тавдгч тойгта Аршанск школын директор Цаһан Басаеван келсәр, иргчдән кеж-күцәх көдлмш дала.
«Я — гражданин России» нертә социальн төсвд эн школын «Төрскнч» нертә седвәрч баг шунмһа кевәр орлцв. Энүнд йисдгч — арвн негдгч классмудын көвүд-күүкд көдлмшән үзүлв. Сурһульчнр дәәнә ветеранмудт санлын медальмуд бәрүлж өгв, дәәнә цагин дуд дуулв, шүлгүд умшв. Төрскән харсгч дәәнә ветеранмудт эн харһлт ик байр үүдәв. Дорас өсж йовх баһчуд баатр-зөрмг кевәр дәәлдсн салсднриг мартжахш. Хамгин түрүнд иим харһлт кех седвәр орулж өгч. Эднә элгн-саднь бас дәәлдсн билә. Тегәд чигн иим төсвд орлцхар шиидж.
Сүркә дәәлдәнд ик әәмшгтә болв гиж ветеранмуд келнә. Немшнр аврлт угаһар бомб хаяд, цугинь күүчв. Иим келвр ветеранмудас сонсхд соньн болна. Эн төсв төрскән харсгч дәәнд нерәдв. Дәәчнрин санлынь тевчж, эдниг мартх зөв уга.
Харһлтын ашт бумбд цецгүд тәвгдв, әмнәсн хаһцсн салдснрн санл тодлад нег минутд тагчг зогсв. Сурһульчнрт иим керг-үүлдврмүд төрскнч сурһмж авлһнд сән нилчән күргнә. Нег үлү, дәәнә тускар эдн ветеранмудас медж авчана.
Ээнән Делгр, Котина Валерий
