“Лидер года” нертә мөрә оютнрт болн багшнрт бәрүлж өггдв
Хальмгин государственн университетин оютнр болн багшнр профосоюзн көдлмшт шунмһа кевәр орлцсн төләд “Лидер года” нертә мөрәһәр ачлгдв. Мөрә авсн баһчуд цугтан сурһулян йилһән сәәнәр сурна, университетин олан бәәдл-жирһлд шунмһа кевәр орлцна.
«Лидер года” нертә мөрәг профсоюзн комитет бүрдәв. Энүг түрүн болж бәрүлж өгчәнә. Шин мөрәг танһчин окнцертн залд байрин бәәдлд бәрүлж өгв. Дииләчнриг мөрәлхин өмн Хальмгин государственн университетин ректор болн эн керг-үүлдврин бүрдәһәчнр номинантриг йөрәв. Түрүн болж мөрә авхин төлә сцен деер хойрдгч курсын оют дзюдон Әрәсән марһана күрл мөнгнә призер грэплингин нарта-делкән чемпион Виталий Настинов һарч ирв. Энүнд “Спортсмен года” нертә мөрә байрин бәәдлд бәрүлж өгв.
Ректор Бадм Салаевин келсәр, иим мөрә баһчуд олна көдлмшт орлцхд сән ничлән күргхмн. Нүүрт йовх көвүд-күүкд иргчдән чигн иим кеәвр жирлһин хаалһар йовж, олна көдлмшт шунмһаһар орлцхд урмд өгх.
Амулнг Лиджиева «Дебют года» нертә номинацд ончрв. Энүнд профсоюзн комитетин көдлмшт шунмһа кевәр орлцсн негдгч курсын оютнр орлцв. Шинжлтын комиссин элчнрин келсәр, иим көвдү-күүд дала. Тегәд дииләчиг йилһж авхд күнд болв. Амулнг Лиджиеван келсәр, школд сурчасн кемд олн зүсн керг-үүлдврмүдт шунмһаһар орлцдг билә. Хальмгин университетин негдгч курсын оютн Амулнг Лиджиеван келсәр, сурһульд олна көдлмш боомтг болхш. Бәәдл-жирһлин йовудт иим кевәр бәәхлә, күн бийән чанһаһад авчкна. Иим мөрә күн болһн авч чадх, зуг дииләч негн болжана.
«Интеллектуал» года нертә мөрә шүүж авхин төлә сурһулян йилһән сәәнәр сурдг баһчуд дөрлдв, тер мет өврәц зурата болн соньн ухан-серлтә оютнр зүткв. Аштнь эн мөрәг номин конференицн дииләч, университетин заллтин болн зөвин факультетин тавдгч курсын оютн Кермн Тазаевад бәрүлж өгв. Дәкәд болхла марһан багшнр дунд бас болв. Эднә нилчәр оютнр эврәннь коллективдан ижлдәд, ни-негн кевәр бәәдг болв. «Куратор года» нертә мөрә Даяна Батыревад бәрүлж өггдв.
Хальмгин университетин хойрдгч курсын куратор Даяна Батыреван келсәр, иим мөрә авснь ик бахмжта болна. Эннб олна көдлмшт орлцсна үүлдвриг үнлһн болжана. Иим мөрә түрүн болж авчана. Тегәд эннь невчк өвәрц болн генткн учрсн йовдл болв. Оютнр иим мөрә авхд бас эврә тәвцән орулв.
Эврәннь номинацдан ончрсн оют болһн универистетин олна көдлмшт шунмһаһр орлцад, иим ик чинртә мөрәһәр ачлгдв. Эн керг-үүлдврин бүрдәһәчнрин темдглсәр, номинац болһна тускар зүткәтә күүндвр кегдв, оютнрин олна цуг халхсин көдлмш үнлгдх зөвтә бәәсмн. Болв аштнь нәәмн номинацар мөрә бүрлж өгхәр шиидгдв. Иим мөрә жил болһн бәрүлж өгх шиидвр авгдв. Тегәд иргчдән номинацин то өсх зөвтә. Эн жил мөрә авсн баһчуд профсоюзн комитетин стипендь авх зөвтә.
Ээнән Делгр, Бадмаран Владислав
