Төрскән харсгч алдр дәәнә ветеран Махмуд Аккочкаровин санл тоджлгч өдрмүд авжана
Төрскән харсгч алдр дәәнә ветеран, хальмг танһчин финансов министерствиг олн жилдән толһалж йовсн Махмуд Аккочкаровин санл тоджлгч өдрмүд авжана. Насн турштан мана танһчд көдләд, танһчин делгрлтд ач-тусан күргж йовсн Махмуд Аккочкаровин таньж-медж, хамдан көдлж йовсн улс тодлврмударн хувалцжана.
Валентина Васькина, Екатерина Авеева, Любовь Антонова, Наталья Абушинова эдн цуһар Махмуд Аккочкоровин һардврт танһчин финансов министерствт көдлж йовсн улс болжана.Арвн долан жилдән Махмуд Зарифханович министрин дакур болад, бюджетн әнг толһалж йовсмн. Махмуд Аккочкаровин санл тодлгч керг-үүлдврт орлцсн күн болһн эн күн мана багш билә, йоста дамшлтта профессионал гиж темдглнә.
Йоста профессионал болсн деерән көдмштән зөвәр дааврта, дигтә —дарата күн бәәсинь тер цагт министрин дарук йовсн Николай Аляев тодлна.
Тер жилмүдт министерствт хамгин сән кадрмуд көдлдг бәәсмн. Дигтә тер цагт хальмгт бухгалтерск школ секгдсн болдг. Махмуд Аккочкаров болн бас нег цөөкн министерствин специалистнр эн школын түрүн багшнр болв.
Онц Махмуд Аккочкаровин тускар келхлә, эн күн төрскән харсгч алдр дәәнә ветера Эврә цагтан зөвәр сурһульта күн бәәсмн. Москван государственн университетин экономикин әнг төгсәсн болдг. Москвад сурсн цагтан сән сурһульлла зергдән театрт одхан марттго бәәсмн. Ик театрт нертә Лемешевиг, Козловскийиг, Обуховаг болн Архиповаг сонсч йовсна, Майя Плисецкая болн Вахтанг Чабукиани эдн орлцата балет үзж йовснань тускар дангинд маднд кеддг билә гиж Махмуд Зарифхановин күүкнь Гульсьтан ухан-тоолврарн хувалцв. Насн турштнь өөрнь итклтә авльн Мерьем Сулеймановна байр-зовлнгинь хувалцж йовсмн. һурвн күүкән эдн бас сән кевәр, олн дунд ни-негн йовдгар өсксмн. Ик күүкн Гульстан бас эцкиннь хаалһар йовсмн. һол көдлмшәсн нань Махмуд Аккочкаров олн зүсн тоотар соньмсдг бәәсмн. Тер тоотан күүкдтән зааж йовсмн-эдндән зург цокдгиг дасхсмн. Дәкәд болхла зуучллһнд йир дурта бәәсмн. Нег күүнә медсиг талдан улс бас дасч чадхмн гиж дангинд келдг бәәсмн. Йоста профессионал, өр-өвч, цаһан седклтә Махмуд Аккочкаровин дүр цааранднь чигн олн-таньл улсиннь санан седклд үлдхнь лавта.
Чүүчән Валентина, Ирчинә Алексей
