Төрскән харсачнрин байрт белдвр кегджәнә
Байрин өдр өөрдж йовна. Февралин хөрн һурвнд төрскән харсачнрин байрт цуг әмтн белдвр кежәнә. Элстин уульнцд бас белдвр кегджәхнь үзгднә. Нег минһн йисн зун арвн нәәмдгч жилин февральд бас иим бүркг киитн өдр Улан церг немшнрин дәврлһ зогсасмн.
Элст балһсна олн халхта гимназин арвн негдгч классин сурһульч Баатр Болтыров төрскән харсач болхан ик кезәнәс авн тодлад авчкла. Талдан эрдм авхар седжәхш, зуг цергә эрдмд дуран өгв. Эн жил ЕГЭ-н шүүврән өгчкәд, цергә училишд орх саната. Тегәд төрскән харсачнрин байр эн көвүнд хамгин һол байр гиж тоолгдна. Байрин өдр белгиг үнн чик седкләсн белглх кергтә, тиигхлә иим белг хамгин сән болх гиж Баатр тоолжана. Баатр Болтыровин келсәр, белг ямаран чигн болх зөвтә. Хамгин сән белг — эврәннь һарарн кесн белг болх. Белг белглхдән дурта.
Әрәсән туужд февралин хөрн һурвнд одахн күртл Советск әәрмин болн цергә тенгин флотын сән өдр гиж темдглдг билә. Ода болхла энүг төрскән харсачнрин өдр гиж нерәддг болв. Февралин хөрн һурвн — олн әмтнә ик байр, эн өдр цуг улст байр үүдәнә. Цергә улс мана төвкнүн бәәдл-жирһл харж харсжана. Тер мет февралин хөрн һурвн әрәсән цуг залу улсин байрт хүврв. Тегәд иим байрла ямаран белг белглх төр олн улсиг үүмүлнә. Байрин өмн өргнд күүкд улс, көвүд-болн ачнр-зеенр магазидт одад, белг хулдж авхар адһна. Эн күүкд күүнә келсәр, олн-зүсн сувенирмуд белглхд сән болна. Зәрмдән бәәцин техник белглж болх, үнртә ус бас белглж болжана.
Төрскән харсачнрин байрин өмн өргнд хулдачнр хамгин олар ямаран белг хулдж авна? Эн сурврт цергт церглсн күн, ода белг хулддг магазинд көдлжәх Савр Топкураев хәрү өгч чаджана. Хулдач Савр Топкураевин келсәр, ода залу улст нурһлж галстук, мөнгнә түнрцг талдан чигн залу улст кергтә предметмүд белглж болжана.
Февралин хөрн һурвнд залу улс ямаран белг авхдан дурта? Эн көвүд маши белглхинь күләжәнә. Эн бичкн көвүн болхла машинк белглхлә икәр байрлх.
Зәрм әмтн эгл белг авхдан дурта, энүг күцәж болх. Талдан улс өвәрц белг авхдан дурлна. Өдгә цагт өдр-сө уга төрскән харсжах салдснр мана орн-нутг төвкнүн бәәлһнә бәәдл теткжәнә. Тегәд февралин хөрн һурвнд иим байр темдглжәхнь бас нег сән керг болжана.
Хавтхна Элла, Котина Валерий
