МВД-н шин көдләчнр андһар өгв
Эндр Элстин Диилврин талвнгд МВД-н һучн шин көдләч байрин бәәдлд андһар өгв. Дөрвн сардан эдн эрдмин белдвр кедг цутхлнгд сурһуль дасв. Сурһулин йовудт баһ наста полцин көдләчнр зөв-йосна медрл авцхав, бөк бәрлдлһнә эв-арһ дасв, бу-селмәс хадг эрдм дасч авв. Эднә багшнрин келсәр, сурһулин заведеньд авсн медрл эднә көдлмшт туслх зөвтә. Эн өдрәс авн эдн полицин көдләчнрин зергләнд орад, диг-дара харлһна церглт күцәхмн. Эдн хальмгин полицин әнг болһнд орад көдлхдән белн болв. Тер тоод вневедомсвтенн харлһна әнгд эднә зәрмнь көдлх. Тер мет баһ наста көдләчнр ППС-ин әнгд, шинжлһнә криминалистическ цутхлнгд болн талдан чигн әнгд церглхмн. Танһчин дотр-дундын кергүдин министр Баатр Гиндеев баһ наста полицин көдләчнриг йөрәһәд, эндр өгсн анһдар әрүн дааврта керг болжана гиж темдглв. Полицин көдләчнриг нериг тадн бахмж кеж, әрүн кеәвр хадһлх зөвтәт гиж министр келв. Тер мет эндр цергә даалһвран күцәж йовад әмнәсн хаһцсн улсин санл тодлгдв. Митингд орлцсн көдләчнр нег минутд тагч зогсад, эднә санлынь тодлв.
