Тохма мал өскдг хамгин ик эдл-ахус федеральн зөөрәс һарад, танһчин медлд оржана
Хальмг танһчин тохма мал өскдг хамгин ик эдл-ахус федеральн зөөрәс һарад, танһчин медлд оржана. Эн зәнг фермермүд дунд дарунь тархагдв. Йирдгч жилмүдт зәрм һазр федеральн медлд орж. Тегәд олн улс һазр уга үлдв. Болв хүврлтин ашт эн бәәдл ясрх гиж селәнә эдл-ахун өдләчнр нәәлжәнә.
Көтчнрә района Чапчаевин нертә племзаводт ода хөрн хойр минһн хөн болн тавн минһн толһа бод мал бәәнә. Эн то ода районд хамгин ик болжана. Һан халун болснас көлтә урдк жилмүдлә әдл эдл-ахун механизатормуд олна малд хот талын һазрт белдж авчана.
Мана үүдәгч баг эдл-ахуд одсн кемд, мал бордлһна комплекст цөн көдләчнр ясврин көдлмш кежәсн бәәж. Иргч хүврлтин тускар эдн сонссн бәәж. Иим хүврлт кеснә хөөн эдл-ахун федеральн зөөрәс һарад, танһчин медлд орхла, деерәс дөн ирх аль угай гиж көдләчнр алмацжана. Ода болхла селәнд бәәдл-жирһл гем уга сән, племзавод көдләчнртән урмд өгч дөннжәнә. Механизатор Анатолий Муткаевин келсәр, эдл-аху хот-хоолар теткнә, эзнә мал өвс авч ирнә.
Алцнһуд нертә муниципальн селәнә бәәрн улс болхла иргч хүврлтин туск зәнгиг байрлж тосв. Селәнә муниципальн бүрдәцин ахлачин тоолврар, ода һазрин пайин төр хаһлгдхмн. Энүнә тускар ирлцнһү сертификат авсн бийнь селәнә әмтн эврә һазрин участкан авч чаджахш. Эдн насни туршарт эн һазрт болн эдл-ахуд чидлән нөөлго көдлсмн. Йирдгч үүмәтә жилмүдт зәрм һардачнр иргчин тускар ухаллго һазриг федеральн зөөрт орулж өгсн бәәж. тегәд ода кесг жилдән Росимушество нертә церглтә зүткән һарчана. Селәнә эдл-ахун муниципальн бүрдәцин ахлач Владимир Дондыковин келсәр. ода Хальмг танһчин правительств эн төриг хаһлад, әмтн эврәннь һазрин пай авч чадх гисн нәәлвр бәәнә.
Владимир Дондыковин тоолврар, әмтн һазр авхла, хойр дам олзта болх. Селән һазрт бәәх улст немр ору орна, муниципальн хазнд болхла һазрас бас алвн орж ирнә. Энүнәс иштә социальн халх делгрлт авхмн. Селәнд газ орулһнд, фельшерск акушерск шин пункт секлһнд Чапчаевин нертә племзаводын һардвр дөн күргв. Ода болхла уудг усар тетклһнә төр хаһлх зура бәәнә. Көтчнрә района һауд тосгджах махна комбинатла өөрхн халһлда бәрх зура племзаводын һардачнр темдглж авла. Көтчнрә района АПК-н заллтин ахлачин дарук Геннадий Азотовин келсәр, иим комбинат экләд, көдлхлә чапчаевихн сән чинртә мал орулж худж чадхмн.
Танһчин медлд орх эдл-ахусин тоод Сухотинский нертә племзавод йовна. Энд болхла бәәдл дегд күнд гиж бәәрн хмтн келн. Ода эдл-аху хольврсн цагт, эгл көдләчнр ямаран чигн хүврлтд иткжәхш. Тегәд чигн телекамерт үг келхдән дурго. Сухотинский эдл-ахун һардачнр болн специалистнр көдлмштән уга бәәж. Зуг племзаводын экономист Федор Брагин мана үүдәгч багла күүндв. Энүнә тоолврар, сүл цагт тотгтсн бәәдлд, акционерн предприятиг Москва балһснд бәәх директормудын хүүв залжана. Теднә халхас ямаран чигн бүртклһн кегдхш. Тегәд иим түрү бәәдл энд тогтж. Экономист Федор Брагина келсәр, энд ямаран бәәдл тогтсна тускар Москвад медхш. Хоосн тооца авна. Тас күн ирхш, нег чигн күн ирж бүртклһ кежәхш.
Ода болхла эн халхар бәәдл ясрх зөвтә. Эн туст Хальмг танһчин правительств шишлнг комиссь тогтав. Комиссин гешүд Сухотинский племзаводын үүлдвр шинжлж хәләхмн. Нег үлү, эдл-ахун директор Дмитрий Шалбуровин шанһа зөөр олзлх зөвиг зогсах шиидвр авгдв.
Чучян Валентина, Очра Сергей
