Бруцеллез гемәр гемтжәх улсин то Хальмгт ик болжана
Хальмг танһчд бруцеллез гемәр гемтжәх улсин то Әрәсән кемжәнәс дөчн холванд ик болжана. Иим то-диг урдк жилмүдт кегдсмн. Эн жил болхла әмтн болн мал иим гемәр олар гемтх гиж специалистнр зәнглжәнә.
Эн жилин эклцәс авн Хальмг танһчд зурһан күүнд бруцеллез гем түрүн болж илткгдв. Роспотребнадзорин региональн заллтин көдләчнрин келсәр, давсн жилин чилгчд иим гемтә дөчн күн бәәсмн. Хойр минһн арвдгжд болхла эн әәмгтә гем дөчн нәәмн күүнд илткгдж. Эн кемжән Әрәсән кемжәнәс зөвәр ик болж һарчана. Эн гемәр нурһлж гемтә мал өскжәх улс гемтнә. Хамгин икәр әәмшгтә гем хөд кирһлһнә хөөн тархагдна. Эпиднадзорин әнгин ахлачин дарук Надежда Чимидован келсәр, түүкә махнас болн үснәс иим гем хальдсн йовдл мана танһчд илткгдәд уга. Эннь хамгин ил темдг болжана. Тегәд түүкә мах олзлх керг уга эс гиж гемтә малын үс уухмн биш.
Эндр өдрт мана танһчд нег минһн долан зун толһа өвртә бод мал болн хөн бруцеллез гемәр гемтжәнә. Эн туст Хальмгин далн нәәмн эдл-ахуд эпидемиологическ халхар му бәәдл тогтснас көлтә, эдн карантинд хаагдв. Иим эдл-ахусас мал һарһж хулдж болшго.
Ветеринарин заллтин специалистнрин келсәр, иим гемтә ммалын махиг сән гидгәр промышленн эд-бод кех кергтә болна. Талданар келхлә, иим махиг зуг консерв келһнд олзлна. Хальмг танһчин селәнә эдл-ахун министерствин ветеринарин заллтин әнгин ахлач Валерий Артаевин цәәлһсәр, бруцеллез гемтә малыг шишлнг санитарн пунктд йовулна. Иим мах әмтнд хулдх зөв уга болжана.
Бруцеллез гем юуһарн әәмшгтә гихлә, эн гемәр күн болн мал удан гемтж, хуучта болж одна. Энүг эдгәх эм бәәнә. Иим эм федеральн программар өнгәр өггднә. Малын эмчнр болн малчнр иим эм эрк биш уух зөвтә. Тер бийнь танһчин зәрм селәнә эдл-ахус малан тәрлһнд орулхар адһжахш. Нег үлү, селәнә эдл-ахун халхар көдлжәх улс иим гем хальдхла ик оньган өгчәхш. Өдгә цагт танһчин хальдврта гемин больницд бруцеллез гемтә әмтн эмнүлгджәнә. Эмч-инфекицонист Ирина Санзырован келсәр, бруцеллез гемәр гемтсн әмтн халу дүрнә, заратрулна, көл-һар өвднә.
Мана танһчин әмтн ода эн туст саг бәәх зөвтә. Түүкә мах, үс уух керг уга. Тер мет мал хәләж асрсн цагт, шав авхла, тер дарунь шавд эм түркх кергтә болжана.
Татьяна Дмитриева, Жамбин Дмитрий
