Техническ хәләврт маши орлһна туск Әрәсән заканд сольвр орулгдв
Ода машина эзүдүдт невчк амр болхмн. Автомобильмудын техническ хәләврт орлһна туск Әрәсән заканд сольвр орулгдв. Шин зокалар техническ хәләврин болн ОСАГО-н полис авхд гиигн болх. Ода машина жолачнр шин документ — диагностическ карточк авхмн. Тер мет йосна дилермудт теткгджәх залачнрт техническ хәләврт машиһан орулх керг уга.
Урднь даатхлһна цаас хулдж авхин төлә техническ хәләврин талона үүлдврин болзг зурһан сарас үлү болх зөв уга. Ода болхла машина эздүд техническ хәләврин талона үүлдврин сул өдрт полис авч адх. Августын йиснәс авн болхла, даатхлһ кесн жолачнр иим тало авх зөв уга. Ода эдн диагностическ карт үзүлх. Энүг техническ хәләвр кедг операторас авч чаджана. Автомобильмудын техническ хәләврин пунктын директор Савр Первеевин келсәр, иим хор документ һарһж өггдх. Негнь пунктд үлдх, негинь машина эздүд авх. Ода зурһан сарин болзг уга кегдв. Эннь жолачнрт амр болв.
Эн жилин январин нег шинәс авн хаалһин полицин көдләчнр маши залаччнрас техническ хәләврин талон суржахш. Диагностическ карточк талонас йилһрнә. Энүнд машина эвдсн ямаран детальмуд яссна тускар бичгдх. Хойр минһн арвн тавдгч жилин августын нег шинәс авн машина эздүд цуг эн документ үзүләд, полис һарһулж авч чадх. Хальмг танһчар ГИБДД-н ах государственн инспектор Санл Лиджиевин келсәр, кемр инспектор машин хаалһд зеткртә йовдлд харһсн болхла, иим документ авад, компьютерар дарунь олж авх арһ бәәнә. Эн керг амр болжана.
Июлин һучна хөөн авсн техническ хәләврин талон чидлән геех гиж Хальмг танһчин даатхлһна компаньсин элчнр келнә. Эн болзгас өмн техническ хәләврт орсн улс дәкәд һурвн жилд иим хәләврт оршго. Даатхлһна компаня филиалын директор Александр Болтыровин келсәр, зәрм техническ хәләврин талонд тииз уга, һаран чигн тәвсн уга. Иим документ хажһр болжана. Энүг техническ хәләвр угаһар хулдж. Эн цаасар полис һарһж өөгднә. Хаалһд зеткртә йовдл учрхла, иим документ даатхлһан компань тоод авшго. Мөнгн чигн өггдшго. Иим ОСАГО-н документ хажһр талһар өггдж.
Тер мет йосна дилермудт техническ тетквр кедг машина эзүдд бас техническ хәләврин тало авшго. Иим компаньд текгджәх улс диагностическ карточкиг амрар авх. Болв техническ хәләврин талон уга кегдснь һазадын ордудт һарч йовжах улст боомтг учрахмн. Тер бийнь техническ хәләврин талог хойр минһн арвн тавгдч жилин августын нег шин күртл даатхлһна компаньс авх зөвтә.
Бевина Мергн, Ирчин Алексей
