Талтахна 500 өркин гелнгүд арвна әәмгин әмтн суврһ тосхснаннь тавн жилин өөнән темдглв

Сүл жилмүдт төрскн һазриннь туужан сергәхин төлә әмтн эврәннь отг әәмгтән суврһ тосхжана. Одахн Талтахна тавн зун өркин гелнгүд арвна әәмгин әмтн суврһ тосхснаннь тавн жилин өөнән темдглв. Бурхн шажна үүлдвр байрин бәәдлд давв.

Кесг зун жил хооран дигтә эн һазрт хальмгуд бәәршлжәсмн. Тиигт энүнд талтахна әәмгә гелнгүд арвна унг-тохма һазр бәәсмн. Эн әәмгин туужнь йир соньн, болв сүл цагт эн туужиг зуг медәтнр меднә.

Һан халун өдр болв чигн өрүн эртәс авн байрта керг үүлдврт орлцхар кесг әмтн ирв. Эн байрт цаһан нур селәнәс болн өөр бәәх селәд поселксин әмтн, хальмг танһчас ирсн гиичнр орлцад, эннь йоста ик байрт хүврв. Суврһ әрүслһнә шажна ик мөргүлиг ламнр цуг авьяс бәрж күцәв. Ламнрин ном умшсна хөөн әмтн суврһ һурв дәкч эргәд мөргв.

Тавн жил хооран эн суврһиг талтахна әәмгә гелнгүд арвна улс тосхгдсн билә. Медәтнрин цуг келсн үгәр дорас өсч йовх баһчуд эн сурврһин тосхлһнд орлцсн билә.

Суврһ тәвснь бас учрта. Юнгад гихлә, эндр өдр дорас өсч йовх баһчуд эврәннь унг тохминнь туужан медәд олн зүсн авьяс күцәһәр шунна.

Дәкәд тер өдр тавн жил хооран суврһ тосхлһна керг үүлдврт орлцсн улст һанлтын бичгүд болн бичкн белгүд байрин бәәдлд бәрүлж өггдсн билә. Талтахна тавн зун өркин гелнгүд арвна әәмгин баһчуд эврәннь билг эрдмән үзүләд олн улсиг байрулв.

Төрскн һазр усн тачалта болдг. Ямр сәәхн һазр эргәд, жирһәд йовснь бийнь һазр усн сангдад төрскнәс энкр, сәәхн юмн һазр деер уга. Эндр өдр Талтахна тавн зун өркин гелнгүд арвна әәмгин улс эн тосхлтар бахмж кежәнә.

Тегәд күн болһн һазр уснаннь, унг тохминь туужан медх хөвтә. Юнгад гихлә урдг угаһар иргч уга болдмн. Эн учрар икчүднь баһчудтан үзссән, сонссан чеежәсн һарһад келәд бәәхлә, үйнрин залһлдан кезә чигн тасршго.

Аджин Светлана, Жамбин Дмитрий