Төрскнч дууна марһан болв

“Салют Победы” нертә төрскнч дууһин марһана дииләчнр Элст балһсна цутхлнг тавлнгд болх ик концертд орлцх хөв авцхав. Марһанд долан настаһас авн бичкдүд һучн тавн нас күртл баһчуд ут-тоодан хөрн күн билг-эрдмән үзүлв.

Марһана түрүн орлцач Баина Джалыкова “Птицы белые” нертә ду дуулж өгв. Келхд, эн бичкн күүкн урднь чигн иим ик сцен деер һарч, билг-эрдәмн үзүлсн билә. Тегәд невчк үүмсн бийнь, дуулсн дууһан сәәнәр дуулад, энүнә үгмүдин чинринь медүлхәр зүткв. Марһа хәләхәр ирсн ветеранмудт дун таасгдв.

Элст балһсна дөрвдчг школын һурвдгч классин сурһульч Баина Джалыкован келсәр, төрскн һазран харсж авсн цуг салдснрт дууһан нерәдж. Энүнә өрк-бүлд аавнь дәәлдсн бәәж, дәәнд әмнәсн хаһцв. Цуг улсиг алдр Диилврин өдрлә йөрәжәнә.

Эн өдр сцен деер бичкдүд дәәнә цагин дуд дуулв, тер тоод “Катюша”, “Офицеры”, “Белый снег войны”, “Аат майор” болн нань чигн дуд олна оньгт тусхав. Бичкн артистнрин келсәр, дәәнә цагин ду дуулхд амр биш болна.

Доладгч тойгта эрдмин лицейин сурһульч Татьяна Урубкина келсәр, иим ду дуулхла, зүркн шарклна. Дәәнд диилвр бәрсн дәәчнр йоста бахмж болжана. Догшн дәәнд эдн әмән әрвлгго ноолдсмн.

Марһана йовудт уйн наста билгтнр виедопрезентац олзлв. Эннь марһана нег некврнь болжана. Дуучнр эврәннь үүдәврмүдән олн-зүсн эв-арһар кеерүлв. Бичкдүдин дуулсн дуд дәәнә цагт салдснриг дөннәд, урмд өгдг бәәсмн, диилвр бәрхд бас туслв гиж келж болх. Дәәнә ветеран Иван Пушкаревин тодлсар, дун болһн эврә тодлврта болна. Төрскән харсгч дәәнә ветеран Иван Пушкаревин келсәр, бичкдүд ду дуулхла нүднәс заядар нульмсн асхрна. Эднә билг-эрдм седкл байрлулж, чееж сергәнә.

Төрскнч дууна марһанд сурһульчнр, оютнр, олн организацсин элчнр орлцад, билг-эрдмән үзүлв. Лауреатнр насни баг болһнд йилһрв. Зәрм көвүд-күүкд диилвр эс бәрсндән һундад бәәв. Тер бийнь иим дөрлдәнд орлцад, Алдр Диилврин байрла ветеранмудыг йөрәсндән эдн ик байрта бәәнә. “Салют Победы” нертә марһана дииләчнр Элст балһсна цутхлнг тавлнгд майин йиснд болх ик концертд орлцж чадх.

Ээнән Ольга, Колдан Церн