Мөшклһнә комитетин көдләчнр дәәнә ветераниг йөрәв

Алдр Диилврин байрин өмн өргнд төсркән харсгч дәәнә ветеранмудыг күндлж йөрәжәнә. Мөшклһнә комитетин региональн заллтын көдләчнр дәәнә ветеран Иван Архипович Сафоновин герт гиичд одв. Эн медәт прокуратурин ветеран болжана. Ода энүнә баатр-зөрмг дәәлдснә йовдлас ведомствин баһчуд үлгүр-үзмж авчана.

Ода күртл ветеран дәәч гиж бийән тоолжана. Иигж Иван Сафоновин тускар келж болх. Дөчн хойрдгч жилин август сард арвн долан наста Иван көвүн цергт мордв. Дәәнә цагт хойр цергә әнгд дәәлдсмн. Белгород балһс сулдхсн дәәлдәнд, Днепр болн Германя аһуд Одер һолмуд һатлсн кемд болсн дәәлдәнд орлцла. Польшин, Дорд үзгин Германьд болсн дәәлдәнд дәәлдв. Хойр дәкж күндәр шавтв. Иван Сафонов арвн нәәмн правительствин ачлврар ачлгдв. Тер тоод негдгч девснгин төрскән харсгч дәәнә орден, Улан Тугин орден болн за отвагу медаль зүүһәч.

Төрскән харсгч дәәнә ветеран Иван Сафоновин келсәр, дәәнә цагт олн улс ик зовлнг үзв. Кесг сай әмтн эврәннь өөрхн улсан геев. Хойр дәкж дәәнд шавтв. Эннь цуг улсин диилвр болв.

Дәәнә хөөн Иван Сафронов Горький балһсна юридическ школд орв, энүнә хөөн деед сурһульд сурв, сурһулин хойр заведениг йилһән сәәнәр төгсәв. Дөнч жилдән прокуратурин оргнамудт көдлв. Энүнә хөөн хөрн жилдән адвокатын үүлдвр күцәв. Алдр Диилврин байрин өмн өргнд мөшклһнә комитетин региональн заллтин көдләчнр Иван Архиповичиг йөрәхәр ирв. Олн-зүсн белгүд дунд “Ветераны следствия” нертә дегтр йовна. Гиичнрлә хадман дәәнә ветеран дегтрлә өөрхн таньлдад, дәәнә туужин халх сергәв.

Хальмг танһчар Әрәсән мөшклһнә комитетин заллтин һардач Денис Минина келсәр, мана өвкнрин үзүлсн баатр-зөрмг йовдлыг мартх зөв угавидн. "Никто на забыт, ничто не забыто" гисн үгмүд ик чинр зүүжәнә.

Хамгин һол ачлвр гиж Иван Сафонов эврәннь өрк-бүлән тоолжана. Зинаида авальтаһан дөчн зурһан жилдән хамдан бәәжәнә. Эдн зурһан үрән өскәд кү кев, ода ачнр-зеенрән, жиж-зеенчрән өскжәнә. Ростовск университетин хойрдгч курсын оют Иван аавиннь санж йовсн төмр хаалһин көдләчин күцлиг күцәжәнә. Келхд, энүнд аавиннь нер өгсмн. Ач көвүн Иван Ересько келсәр, иим алдр аав бәәснд ик байрта бәәнәв. Догшн дәәнә һалвд орад, цус-махан асхсмн.

Арвдгч класст сурчаһад Иван “Письмо ветерану” марһанд диилвр бәрсн билә. Тегәд аавиннь баатр-зөрмг йовдлас үлгүр үзмж авч өсв. Дорас өсж йовх үйнр төрскән харсачнриг эс мартжахнь Иван Архипович Сафоновд өөрджәх байрла йөрәснәс деер болж медгднә.

Ээнән Делгр, Колдан Церн