Сурһульчнрин эрүл-мендиг урдаснь хәләж шинжлх кергтә
Тер саамд сурһулин шин жилин өмн эк-эцкнр эврәннь үрдүдин эрүл-мендин тускар ухалж үүмнә. Бүкл жилдән эдн ямаран кеәвр бәәх, сурһульднь гем харш болхий аль угай гиж хоорндан күүнднә. Көвүд-күүд сурһулин шин жилд дала дегтр умшх зөвтә. Өдгә цагин таалд, компьютермуд олн цагт болн интернет икәр олзлжах кемд бичкдүдин нүдн үрнә. Тегәд чигн ода окулист эмд орх күн дала болна.
Дөрвн наста Шарап көвүнә нүднь сольр гиж эмчнр келв. Энүнә экин келсәр, көвүнә нүд шинжлж хәләһәд, тер дарунь нүднә эмчд одв. Эмч энүнд ямаран козлдур зүүх цаас бичж өгв, Ставрополь балһснд одад, эмчнрин хәләврт орв. Тенд нүднә харань му гиж илткв. Ода көвүг удан болзгт эмнүлх кергтә. Шамсият Курбанован келсәр, өрүн эрт серәд, Ремонтное селәнд одв. Тенд эмч олдсн уга. Тер дарунь ирсн бийнь, эмчнр уга бәәж.
Ниджад Нияззаде болхла окулистын кабинетд түрүн болж иржәнә. Сурһульд орхар справк авхар одв. Болв көвүнә нүднь дегд сән биш гиж эмч илткв. Дегд икәр шилтәд нүдән мууртл хәләснәс көлтә, нүднә харань дор орв. Дегд удан компьютерар көдлхлә эс гиж телевизор кесгтән хәләхлә иим бәәдл тогтна. Ода Ниджадын нүднд эм кех кергтә, талдан чигн эмнүлһ авх селвг өггдв. Ниджад Нияззаден келсәр, нүдн мууһинь медж, зуг эмчд одсн уга бәәж. Козлдур өмсх дурн уга, энүнә ормд контактн линз зүүх саната.
Эмч Эльвира Очирован келсәр, нүднә харань му бичкдүд олн-зүсн ик конструктормуд олзлж наадх зөвтә. Тиигхлә нүднә харанд сән болна. Энүнә темдглсәр, нүднә гемтә бичкдүдин то жил ирвәс өсәд йовна. Бичкдүдин поликлиникин окулист-эмч Эльвира Очирован цәәлһсәр, ода нурһлж бичкн көвүд-күүкд миопия, астигматизм болн гиперметропия гемәр гемтжәнә. Хойр наста бичкдүдт астигматизм гем илткгднә. Тегәд иим көвүд-күүкд эмчин тодрха шинжлтд орна. Эдниг эмнүлх цаас өгнә, нүдинь ясрулх козлдур зүүх селвг өггднә.
Нарнас халхлдг козлдур өмсәд, нүдән үрәх әәмшг бәәнә. Энүнә тускар мартхмн биш. Нүдән чикәр эс харсхла, нарна толян нүднә хрусталикд хорлтан күргнә. Тегәд талдан әмт дураһад, бичкдүд айстан нарнас халхлдг козлдур өмсх керг уга. “Оптика” нертә предприятин директор Екатерина Булхумован келсәр, базрт нарнас халхлдг козлдур хулдж авч болшго. Тенд иим козлдур дала, нег үлү дегд үнтә биш. Болв кимд козлдур нарна толянас харсхш. Энүнд тәвгдсн пластмасс эс гиж шил нарнас тадниг халхлшго. Иим шил нүднд му, юнгад гихлә нарна ик толян нүднд тусад, хорлтан күргхмн.
Сурһулин шин жилин өмн цуг көвүд-күүкд эрк биш окулист эмчин хәләврт орх зөвтә гиж специалистнр селвг өгчәнә. Нүднә харан муурхла, эмчин бичж өгсн козлдур өмсх кергтә. Нүдән бичкнәсн авн хәләж хардг авьяс дасж авхла, өсәд босхла нүднә харан мууршго.
Ээнән Делгр, Очра Сергей, Хавтхна Анатолий
