Сурһульчнр хувцндан герлтдг тасм зүүх зөвтә

Давсн жилин ашар мана танһчд харнһу кемд хаалһд далн зеткртә йовдл учрв. Энүнәс һучн насни дигт күрәд уга бичкдүд орлцата йовдл болв. Бичкдүд хаалһд шав авлһиг баһрулхин төлә Әрәсән Госдумд хувцндан герлтдг тасм зүүхин туск закан төсв орулж өггдв. Иим зака батлж авсна хөөн эк-эцкнр эврәннь бичкдүдин хувцнд герлтдг тасм зүүх зөвтә.

Хаалһд учродг зеткртә йовдлмудын дунд йовһн улситг дәврдг йовдл хамгин олн. Уд луга герлттдг тасм Әрәсән бичкдүд эрк биш хувцндан өмсх зөвтә. Депутатнрин тоолврар, иим герлтдг тасм зүүхлә, көвүд-күүкдиг ик холас үзж болх. Нег үлү, харнһу кемд эннь сән нилчән күргх. Кемр йовһн күн харнһу кемд хаалһла ниилсн хувц өмсхлә маши залачнрт кү ик холас үзхд күнд болна. Жолач Виталий Баркуновин келсәр, Элст балһснд ик холас үзгддг хувцндан иим тасм өмссн кү үзәд уга.

Жолач Виталий Баркуновин келсәр, намрин-үвлин кемд асфальт чиигтә болна. Хаалһар йовж йовсн кү үзхд күнд болна. Нег үлү, баһчуд машиһар түргәр йовхдан дурта. Тегәд иим тасм хувцндан өмсхлә сән болх.

Тер саамд ГИБДД-н көдләчнр эн туст статистикин то-диг кев. Харнһу цагт хаалһд зеткртә йовдлд харһад шав авх эс гиж әмнәсн хаһцх әәмшг дөчн дөрвн процентд икднә. Кемр әмтн хувцндан герлтдг тасм өмсхлә, эдниг үзх арһ һурвн холванд өснә. Тиигхлә жолачд чик шиидвр авхин төлә немр цаг үлднә.

ГИББД-н инспектор Игнат Куцековин келсәр, ода үвлин кемд жолач хаалһар йовж йовсн кү үзхд күнд. Эдниг зуг хөрн-хөрн тавн метрт үзнә. Частан жирн дуунда йовж йовсн машинд зогсхин төлә күсдундур секунд кергтә.

Ода деерән Элст балһсна сурһульчнр хувцндан иим тасм өмсхәр седжәхш. Тер бийнь эдн иим тасм кергтә гиж эдн тоолжана. Эднә келсәр, хаалһар әәмшг уга йовлһна төрмүдт нерәдгдсн керг-үүлдврмүдт эдн школдан шунмһа кевәр орлцна.

Эн күүнә келсәр, иим тасм хулдж авх саната. Бимбаевин нертә уульнцд бәәнә. Олн хаалһ керчх кергтә болна. Энүнә тоолврар, бичкдүд иим фликер эрк биш хулдж авх зөвтә. Тер мет эднә портфельд бас иим тасм кергтә. Жолачнр хаалһар дегд түргәр йовдг болв.

Элст балһсна бәәрн күүкд күн Мира Болдуринован келсәр, хувцндан өмсдг герлтдг тасмиг үдин хөөн школдан оддг сурһульчнрт кергтә. Үвлин кемд өдр хар цагт эрт харнһурна. Тегәд энүнә көвүнь школасн ора харнһу цагт хәрж ирнә. Өдр болһн көвүһән школас тосж авх кергтә болна гиж күүкд күн келнә.

Мира Болдуринован келсәр, көвүн үдин хөөн школд одна. Бичкдүдин ик зунь школасн эврән хәрж ирнә. Тегәд эднд иим герлтдг тасм эрк биш кергтә.

Нег үлү, велосипедар, роликар болн самокатар нааддг бичкддүт хаалһд ик әәмшгтә болна. Кемр сурһульчнр хувцндан герлтдг тасм өмсхлә, хаалһд бичкдүд орлцата зеткртә йовдлмудын то баһрх. Тер мет бичкдүд хаалһар йовлһна зокал күцәж саг бәәх.

Ээнән Ольга, Эрнжәнә Эрднь