Шин жиләс авн эрдм-сурһулин халхд шинрүлһн кегдх
Эрдм-сурһулин халхд шинрүлһн кегдх. Иим хүврлт сән ашта болхий аль угай? Эн төр Ик-Буурла района улсиг үүмүлжәнә. Иргч жилин январин нег шинәс авн бичкдүдин искусствин школыг үүдәлтин герлә негдүлх. Района һардачнрин иткүлсәр, эн кергәс әәх керг уга.
Искусствин школын бичкдүдт сцен деер һарад билг-эрдмән үзүлхләрн, эдниг дөннхәр ирсн эк-эцкнр, өөрхн улсь ямран учрар иим олар цуглрсн тускар меджәхш.Эднә концерт сүл болх бәәдлтә. Көвүд-күүкд бас эн зәнгин тускар ухалхш бәәдлтә.Найн һурвдгч тойгта федеральн заканас иштә эднә учрежденьд оптимизац болад, чинрнь сольгдхмн.
Оптимизац гисн үг латын келнәс орчулхла, олн-зүсн таалас хамгин олз-тууста хамгини сән таалынь шүүж авлһн болжана. Шин закаһар хойр учреждень негдх зөвтә. Тас чинрәрн әдл биш көгжмин болн бичкдүдин үүдәлтин гериг негдүлх саната. Болв эн хойр учреждень бичкдүдт немр сурһуль өгчәнә. Энүгрн эдн әдл зөрүлттә. Шин закана тускар ик-буурлахн сонсчкад, хойр әнгд хувагдв. Эднә нег әнгнь иим хүврлт керг уга гиж тоолжана. Ик-Буурла района искусствин школын директор Галина Дорджиеван келсәр, мана учреждень муниципальн эрдм-сурһулин чинртә, багшнрт педагогическ стаж өггднә. Тегәд хүврлт кехлә, мана көдләчнр ямаран стажта болхмн? Медгджәхш.
Тер иим шиидвриг эк-эцкнр бас дөннжәхш.Эндр өдрт школд һучн долан бичкдүдт оржана. Энүнд ду дуулдг, келн-улсин зевсгүдәр, баянар болн фортепиано нааддг дасхжана. Бичкдүдин искусствин школын сурульчнр олн-зүсн марһаст лауреатын нер зүүсн билә. Ода болхла эдн альд сурхмн? Урднь школ төгсәсн хөөн сурһульчнрт аттестат өгдг билә. Иим документар искусствин училишд орж болх бәәсмн. Ода болхла хоосн справк өгх бәәдлтә. Эн залу күүнә келсәр, искусствин училишла бооца батлж авгдв, устав үүлджәлә. Ода эн документ альдаран кехмн? Күүкд күүнә келсәр, эн жилин мини күүкн школ төгсәжәнә. Цаарандан альд сурхнь медгдәхш.
Ик-Буурла района администрацин һардачнр эк-эцкнрин ухан-тоолвр сонсчкад, селвлцә кев. Мана үүдәгч баг ора ирнс болв чигн, эдн хурган кеһә бәәж. Района толһач Сергей Базыров, социальн әнгин толһачин дарук Светлана Аджиева болн финансин заллтин ахлач Сергей Тосунов эн төриг хаһлхар иткүлв. Эднә тоолврар, хүврлт кехлә, ик әәмшг уга. Негдвәр, эннь найн һурвдгч тойгта федеральн закана неквр болжана. Хойрдвар хүврлтин ашт бичдүд һундагдшго. Тер мет хамгин һол төрнь, мөнгәр тетклһнә кемжән урдк кевәр үлдх. Иргч жилин январин нег шинәс авн шин учреждень эврә бюджетта болх. Ик-Буурла района финансин заллтин ахлач Сергей Тосуновин келсәр, эдн бюджетн организац болх. Эдн бооца батлж авх зөвтә, банкд эврә счетта болх. Шин учрежеднь эврә зөөртә болад, директорин медлд зөөр орулгдх.
Администрацин иткүлсәр, хойр учреждень негдхлә, му болшго. Тиигхлә районд бичкдүдин үүдәлтин нег бәәшнг үүлдх. Багшнр болхла тер кевәрн көдлхмн. Көгжм дасхжасн багш, талдан эрдмәр көдлшго. Әрәсән шин закан ирх жилин январин нег шинәс авн үүлдврт орх.
Дмитрий Ивахненко, Бадмаран Владислав
