Шин жилин байрин ширәд кедү мөнгн кергтә?
Шин жилин байр күртл дала цаг үлдсн уга. Ода элстихн байрин ширәд кедү мөнг кергтә гиж тооца кежәнә.
Шин жилин байр күртл ода чигн цаг бәәв чигн, магазидт болн базрт олн улс ирж хулд кежәнә. Хамгин дурта байрт зәрм әмтн ик эртәснь белдв кехәр шиидв. Надежда Алиева эврәннь өөрхн улстан болн элгн-садндан белг хулдж авхин төлә тавн минһн арслнг һарһв. Декабрин һучн негн күртл үршго хот-хол бас белдәд авчкв.
Надежда Алиеван келсәр, хойр така хулдж авч, такан фарш белн. Цусна дарлт ик болад, гөнгн хот авна. Олн-зүсн салатмуд белдх, зер-земш болн темсн хулдж авгдх.
Ик эртәсн белдвр кежәх болн әрвн герин эзн күүкд күн гиж Анна Цереноваг бас тоолж болх. Хот-хоолыг базрт хулдж авх саната. Энд махн сән чинртә, нег үлү талдан хулд-гүүлгәнә магазидас махн энд кимд болна. Шин жилин байрин ширәд кедү мөнгн һархин тускар олн улсин тоолвр әдл биш.
Анна Церенован келсәр, базр эргәд йовж, нәәмн зун далн арлснг һарв. Күсдундур минһн арслнг барт һарх, дәкж арһ уга. Эн күүкд күүнә келсәр, авальтаһан хоюрн бәәнә. Дала хот белдхш. Урдк жилмүдлә әдл дала хот-хол хулдж авшго. Дундлад һурвн минһн һарх.
Жил болһн кедг оливье, сельдь под шубой болн шампанское өрк-бүл болһн хулдж авч чадх. Талдан хот-хоолыг эврәннь мөнгнә кемжәһәр әмтн хулдж авна. Эн жил давсн жиллә дүнцүлхлә, байрин ширәд хот-хол хулдж авхд ик мөнгн һарх. Үлгүрнь, такан өндгн сүл цагт зөвәр үнтәрв. Ода арвн өндгн жирн арслнг күрчәнә. Боднцг һучн шаху процентд өсв, колбасн кегдлмүд дөрв һар процентд икдв. Махн болн шовуна махн болхла давсн жилин эн кемлә дүнцүлхлә нәәмн шаху процентд кимдрв.
Калмыкиястатын әнгин ахлач Эльзата Анджаеван келсәр, эн жэилин эклцәс авн үснә зүүтә хот үнтәрв, такан өндгн һучн негн процертд өсв, темснә продукц хөрн долан процентд икдв. Әрк-чаһр хөрн негн процентд үнтәрв. Хамгин бичкн кемжәтә хот-хоолын кемжән хойр минһн долан зун арслнг тогтав. Хамгин икәр хот-хол Городовиковск балһснд үнтәрв, Элст балһснд йисн һар процентд өсв, Лагань нәәмн процент хот үнтәрж.
Тер саамд хулдачнрин келсәр, һахан, хөөнә болн үкрә махн шин жилин байрин өдр күртл икәр үнтәршго. Сүл цагт элстихн махна продукциг баһар хулдж авдг болв.
Хулдач Анна Бадмаеван келсәр, махн үнтәршго гиж санжана. Эн жил махн үнтәсрн уга. Ода үкрә махн зун тәвн-зун жирн арслнг күрчәнә.
Байрт һарх цуг һаруһан тоолад һарһчкад, шин жилин байрин ширәд хайсн бийнь дундлад дөрвн минһн арлснг кергтә болх гиж хотл балһсна әмтн тоолжана. Шин жилин байриг ресторанд тосдг улс болхла байрин ширән төлә һурвн минһн арслнг өгх зөвтә. Энүнд хот-хол болн сойлын программ оржана.
Ээнән Ольга, Хулхачин Николай
