Цаажин һашута өөнд нерәдгдсн бичкн зурачнрин марһан болв

Танһчин бичкдүдин үүдәлтин цутхлнгд хальмг улсиг цаажла харһулсн далдгч жилин һашута өөнд нерәдгдсн марһан болв. Энүнә нернь арвн һурвн жил, арн һурвн өдр. Товчлгч марһанд райодын үүдәлтин дөрлдәнд диилвр бәрсн бичкдүд ирж орлцв. Жюрин ханьд орсн танһчин нертә зурачнр, туужин номтнр дииләчнриг хойр номинацар йилһж авв.

Жил ирвәс тууврт күзүцә золвлнг үзсн улсин то баһрад йовна. Ода хамьмг улсин һашута туужин халхин тускар эднә ачнр-зеенр, жич-зеенчнр келж өгхдән белн бәәнә. Тер тоод арвдгч классин сурһульч Татьяна Мутулова. Эн күүкн эврәннь аавиннь туужин тускар келж өгхәр Көтчнрә районас ирж. Хальмгудыг Сиврт нүүлһсн цагт Николай Мутулов нилх бәж. Өсхләрн тууврин цагин тускар эврәннь экәсн медж авч. Ода тер һашута цагас авн далн жил давв. Тер бийнь ода күртл аавнь тер цагин тускар келхләрн нүднәснь нульмсн заядар асхрна гиж энүнә ач күүкнь келнә. Сурһульчин келсәр, энкр улсин дааж һарсн зовлнгиг, догшн киитнд даарад, өлсәд харһнад өнгрсн бичкдүдин, көгшдүдин болн күүкдин улсин туск келврмүдин зүркндән орулж шингәж авчана.

Татьяна Мутулован келсәр, энүнә аавнь тер цагин тускар тодлхла, нүднәсн нульсмн асхрна, күүкнә зүркнь бас шарклж өвднә. Тер цагин туужиг келж өгх саната. Тегәд марһанд ирж орлцжана.

Зург нертә номинацд диилвр бәрхин төлә һучн бичкдүд дөрлдв. Эдн эврәннь көдлмшән карандашар, гуашар болн ширәр зурж. Октябрьск районас ирсн Виктория Доржиева в холодную неизвестность нертә көдлмш белдж. Энүнә тоолврар, көдлмшин түрүн әнгнь нег өнгәр зургдв. Иим кевәр тер цагт дөчн һурвдгч жилин декабрь сард учрсн йовдлын тускар сәәнәр медүлж болжана. Көдлмшин хойрдгч әнгнь олн өнгтә ширәр зургдж. Энүнд хальмг улс тууврт йовсн цагт үлдәсн зөөр үзүлгджәнә.

Виктория Дорджиеван келсәр, көгшдүдин тодлврмудас һашута цагин тускар медж авч. Эн зургуд хурхларн седвлән өгәд үүдәж. Энүг хойр әнгд хуваж. Түрүн әнгд хальмгуд яһж туврт йовсна тускар келгджәнә, хойрдгч әнгд хальмгуд нүүлһснә хөөн ю үлдәсн тускар үзүлжәнә.

Танһчин марһана бүрдәһәчнрин келсәр, хальмг улсиг цаажла харһулсн һашута йовдлар дорас өсж йовх баһчуд икәр соньмсжана. Эннь бас учрта, юнгад гихлә эн аюлла хальмг улсин цуг өрк бүлмүд харһв. Тегәд чигн марһанд орлцачнр эврәннь аав-ээжнрин туужин тускар келж өгхәр шунв. Энүнә төлә эдн нег күүнә эс гиж кесг үй улсин туужин үлгүр авч олзлв.

Бичкдүдин үүдәлтин цутхлнгин директор Ирина Очирован келсәр, марһанд бичкдүдт йир даавртаһар орлцв. Цаажла харһулсн төриг эдн зүркндән орулад зургудар дамжулж үзүлв. Дөрлдәнд орлцсн күн болһн эн йовдлыг үзүлж чадв.

Эн жилин чилгч күртл мана танһчд цаажин далн жилин һашута өөнд нерәдгдсн марһас, концертмуд, һәәхүлмүд бүрдәж давулгдх. Мана өвкнрин дааж һарсн ик зовлнг мөнкинд мартгдшго гиж хальмгуд келнә. Тер күнд-түрү цагин тодлврмуд зүркнә эдгшго өвдкүр болж үлдх. Күзүцә зовлнг дааһад һарсн улс тер цагин тускар дорас өсж йовх үйнрт келж өгх зөвтә.

Ээнән Делгр, Хавтхна Анатолий