Шарнуд селәнд дәәлдсн салдсин тускар Казахстана телеүзүлвр фильм цокж авх
Дәәнә цагт Сарпинск района аһуд болсн дәәлдәнд хасг Карсыбай Спатаев баатр-зөрмг кевәр дәәлдәд, Шарнуд селнд немшнриг орулсн уга. Эн сүркә дәәлдәнд Карсыбай әмнәсн хаһцв. Эн өдрмүдт Казахстанас телеүзүлврин журналистнр Шарнуд селәнд ирхд, эврә һазрин салдсин тускар фильм цокж авчана.
Сарпинск района Шарнуд селәнд мемориальн комплекс бәәнә. Энүнд жирн негдгч тойгта мөрнә цергин дивизин дөрвдчг кавалерийск корпусин дәәчнр оршагдсмн. Тер тоод арвн һурвдгч салу дивизиона артиллерист Карсыбай Спатаев энүнд оршагдла. Энүнә һарджасн әнг Шарнуд селәнд немшнрин танкмуд орулшго даалһвр авсмн. Тер сүркә дәәлдәнд цуг дәәчнр әмнәсн хаһцв. Зуг Спатаев әмд үлдж.
Сүл танкиг зөрмг дәәч мин һартан авад танкин дор кевтәд, уга кев. Энүнә хөөн немшнр дәврдгән уурв. Баатр-зөрмг дәәч Карсыбай Спатаевд Советск Союзин Геройин нерн зүүлһгдв. Ода Чимкент балсһнас ирсн телевизионн баг энүнә тускар фильм цокж авхар Шарнуд селәнд ирв. Хол һазрас ирсн гиичнриг хальмг авьясар тосж авв. Мемориалын өөр бичкн митинг болв. Сарпинск района ахлач Юрий Жуковин тоолврар, эн зөрмг дәәчин үлгүрәр баһчудт төрскнч сурһмж өгх кергтә.
Района администрацин ахлач Юрий Жуковин келсәр, февралин хойрла Сталинградск дәәлдәнә далн жилин өөн темдглвидн. Карсыпайин баатр-зөрмг йовдл тер сүркә дәәлдәнә нег әнгнь болв. Хаджимулла Идрисовин келсәр, нааран ирнсдән байрта бәәнә. Путина келсәр, бидн хамдан бәәләвидн, хамдан дәәнд диилвр бәрләвидн. Мадниг салһхар седсн улс эврәннь күцлдән күршго.
Шарнуда дундын школд “Никто не забыт, ничто не забыто” үгүмд ода күртл чинрән гееһәд уга. Эн школд төрскән харслһна дәәнд баатр-зөрмг кеәвр дәәлдсн салдснрт нерәдгдсн стенд бәәнә. Далдгч жилмүдт школын пионерск дружин Карсыбай Спатаевин нер зүүжәсмн. Телекомпаня һардач Дулат Абишин келсәр, гертә хәрж ирәд, эврәннь ахлачнрла күүндәд, Карсыбай Спатаевин төрскн селән Шарнуд селәнлә ах-дү болгч һазр тогтах шиидвр авх кергтә.
Сүл дәәлдәнд орцлад, Спатаев әмнәсн хаһцсн һазрт гиичнр одад, Казахстана гиичнр эврәннь авьяс күцәв. Школын директорт эдн зөрмг дәәчин төрскн һазрас авч ирсн шавр бәрүлж өгв.
Энүнә тускар хасгин журналистнр Советск Союзин Герой Карсыбай Спатаевин туск фильмд келж өгх.
Харлун Бадма, Грицкон Роза, Колдан Церн
