Элстин хойрдгч школд цуг сурһульчнр хальмг кел дасжана

Хальмгин олн-әмтнә хуралын сүүрт хальмг келнә босхмжин болн делгрүлһнә төр хамгин һол керг болх зөвтә гиж танһчин толһач темдглв. Эн төриг Элст балһсна хойрдгч школд сәәнәр хаһлжана. Школын сурһульчнр ямаран келн-улсин элчнр болв чигн, цугтан хальмг кел дасжана.

Элст балһсна хойрдгч тойгта школд хальмг келнә марһан дару-дарунь бүрдәгднә. Энүнд цуг сурһульчнр болн багшнр хальмг келнә медрлән үзүлнә. Эн саам марһана бүрдәһәчнр дөрлдәнд эк-эцкнриг орулв. Эк-эцкнр сән мекдрлән үзүләд, талдан орлцачнрас хоцрсн уга.

Марһана даалһвр олн-зүсн чинртә болв. Хальмг улсин авьяс-зангшал медлһнә марһанд белдхин төлә ик цаг кергтә болв. Хальмг цә ууж йөрәлһнә, хүрмин авьяс болн гиичнриг тосж авдг зангшал үзүлсн улсиг хәләһәчнр бүләнәр тосж авцхав. Аштнь жюрин гешүд марһана орлцачнрин үнләд, баллмуд тәвхин ормд, талдан хәләһәчнрлә хамдан орлцачнрин билг-эрдм ик оньган өгч хәләв.

врәннь сурһульчнрас үлгүр авад, марһанд дөрлдв гиж багшнр өгсн интервьюдан темдглв. Тегәд эдн бас хальмг кел даслһхна кичләд орхар шиидв. Көвүд-күүкдлә хамдан олн-зүсн керг-үүлдврт орлцад, келнә медрлән гүүдүлв. Зәрм багшнр бичкн нааднд орлцхдан дурта.

Школын багш Нина Шипакован келсәр, энүнд хальмг келнә кичәл олз-туста болна. Шин медрл авна. Йир соньн болна. Школын директорин дарук Елена Ненькина келсәр, дала кел медхлә, сән болх.

Иим ик чинртә көдлмш кежәх коллективд диплом бәрүлж өгснь ачта мөрә болв. Элст балһсна хойрдгч школ талдан келн-улсин бичкдүдт хальмг кел дасхжах ор һанцхн сурһулин заведень болж һарчана. Энд иим көдлмш хөрн жилдән кегджәнә. Школын директор Галина Горбаневан келсәр, энд сурчах дөрвн зун найн көвүд-күүкдәс зуг дөчн сурһульч хальмгуд. Талдан бичкдүд орс эс гиж талдан келн-улсин элчнр. Эдн цугтан хальмг кел дасжана. Нег чигн күн хальмг кел дасшгов гиж келхш.

Галина Горбаневан тоолврар, кел дасх хоосн санан сурһульчнрт тус болшго. Эн туст багшнрин ик тәвц бәәхинь темдглх кергтә. Хальмг кел даслһна эврә методик школд белдж авсн билә. Энүг эдн харсад, ода бәәдл-жирһлд тохражана. Эднә методикар талдан регионмудт бас соньмсв. Ода болхла эднә дамшлт хоршахар талдан регионмудас әмтн иржәнә. Танһчин правительствин ахлачла болсн харһлтыг сурһульчнр болн багшнр сәәнәр тодлна. Эн школд ирснә хөөн, Игорь Зотов бас хальмг кел дасхар шиидв. Энүнә төлә хальмг келнә багшнрас дөн сурв. Ода премьер эврәннь өгсн үгдән күрчәнә. Школын директор Галина Горбаневан келсәр, ода танһчин правительствин ахлач хальмг келнә кичәлд орна, кел сәәнәр дасжана. Энд көдлжәх күн хальмг кел медх зөвтә.

Элст балһсна администрацин толһач Артур Дорджиевин келсәр, хойрдгч тойгта школд хальмг кел даслһна дамшлт талдан сурһулин заведеньст үлгүр болх зөвтә. Элст балһсна администрацин толһач Артур Дорджиевин келсәр, эннь йир сән керг. Эднәс үлгүр авх кергтә. Иим марһан цаарандан кех санан бәәнә. Эднд урмд өгәд, мөрәлх кергтә.

Чучян Валентина, Хулхачин Николай