Селәнә школд баһ наста багшнр көдлхдән дурлжана

Бичкдүд ямаран чигн һазрт бәәсн бийнь, сән чинртә медрл авх зөвтә. Селәнә школын багш Евгений Менкеев иим тоолврта бәәнә. Эн баһ наста специалист Целинн района Деед Яшкулин школд көдлжәнә. Баһ наста багшин тоолврар, бичкдүдт селәнә школд цуг таал бүрдәх кергтә.

Евгений Менкеевин кежәх туужин кичәлд одсн кемд, нәәмдгч классин сурһульчнр багшан ик оньган өгч сонсжахнь үзгдв. Класст ода зуг тавн сурһульч сурчана. Тегәд эдн цугтан багшин оньгас алдрхш. Баһ наста багш эн школд дөврн сардан көдлжәнә. Энүнә өмн балһснд көдлжәсмн. Селән һазрт багшар көдлхд ода сән болна гиж Евгений келнә. Нег үлү, селән һазрт төрж өсж босла. Тегәд энд бәәдл-жирһл даслт болад бәәв.

Деед Яшкулин школын туужин багш Евгений Менкеевин келсәр, селәнд таасгджана, энд школ сән, сурһульчнр чигн бас сонсурч. Селән һазрт школыг босхж авх кергтә.

Баһ наста багш нааран ирхлә, селәнә муниципальн бүрдәцин ахлач энүнд бәәдг гер йилһж өгв. Багшин гернь школын өөр бәәнә. Евгений Анатольевич келсәр, гернь хойр бичкн хораһас тогтна, тер бийнь эврә бәәдг гертә болв. Газар түлдг беш бәәнә. Евгений Менкеевин келсәр, ода һаза дулан бәәнә. Тегәд газиг невчк баһрулж болх. Эннь йир эвтә болна.

Эн школд дәкәд нег баһ наста багш физкультурин багш Баснг Бюрчиев көдлжәнә. Баснг эн селәнд һарсмн, энд өсж босла. Төрскн селәндән хәрж ирәд, энкр школдан көдлжәнә. Энд дурта көдлмш күцәжәнә, сурһульчнр энүнә үгд орна. Басн Бюрчиевин келсәр, ода селәнә школд баһчуд көдлхдән дурлхш. Тегәд эн төриг медәд, эврәннь школдан көдлхәр шиидв. Эврәннь селәндән дөн болх кергтәлм.

Ода деерән эн селәнә школд физикин, эсвин болн информатикин багшнр дутжана. Энд көдлжәх специалистнр олн предмет дасхжана. Үлгүрнь, биологин багш шишлнг сурһуль дассна хөөн, хойр класст физикин предмет заажана. Нурһлж школ дик дамшлтта багшнр көдлжәнә. Пенсионермуд чигн бәәнә. Школын директор Юлия Скиданован келсәр, олн-зүсн учрар баһчуд селәнә школд көдлхдән дурлжахш. Болв эн школд баһчуд ирж көдлжәнә. Нег үлү, энд ода хойр залу күн багшлжана.

Школын директор Юлия Скиданован келсәр, ода баһ наста багшнрин жалв бичкн. Школд көдлхд йир дааврта болв. Неквр чанһржана. Жил ирвәс иим неквр багшнрт чанһ болжана.

Келхд, энд кесг жилдән баһ наста багшнрин школ үүлджәнә. Эн школ баһ наста специалистнрт сурһулин көдлмштнь дөн болна, шин коллективд ижлдхд нөкд болна. Селәнә һазрт багшнр көдлхин төлә танһчин һардачнр баһ биш көдлмш күцәжәнә. Эн туст Хальмгт һазрин хәрлцәнә туск закан сән нилчән күргх. Ода энүг танһчин парламентин хәләврт орулж өгв. Шин закаһар селән һазрт көдлжәх багшнрт һазрин участк өггдх. Баһ наста специалистнр эн һазрт бәәдг гер бәрж чадх, эдл-аху босхж чаджана.

Хальмгин олн-әмтнә хуралын ахлач Анатолий Козачкон келсәр, һучн тавн нас күрәд уга селәнд эс гиж балһснд көдлжәх багшнрт һазрин участк өггдх. Иим кеәвр школд көдлжәх баһ наста специалистнриг дөннх санан бәәнә.

Хойр минһн арвн хойрдгч жилин июлин нег шин хөөн деед эс гиж дунд эрдмин сурһуль төгсәснә хөөн һурвн сар боллго экләд көдлсн һучн тавн нас күрәд уга баһ наста багшт тәвн минһн арслнг дөнцл мөнгн өггдх. Энүнә тускар танһчин толһач ирлцнһү зәрл батлж авв. Тегәд Деед Яшкулин школд көдлжәх баһ наста багшнр иим дөнцл мөнг авч чаджана.

Ээнән Ольга, Очра Сергей