Сарпинск района Шарнут селәнә сурһульчнр 9 өдр дав зуур сурчахш
Йисн өдр Сарпинск района Шарнут селәнә сурһульчнр школдан дав зуур сурчахш. Ода школын классмудт дегд киитн, нег эклц классмудын бичкдүд даарна. Ода классмудын хораст арвн градус дулан. Сарпинск района хамгин хуучн школын негнь урдк кевәр бешәр дулалгдна. Энүнә котельнд оборудовань хуучрв.
Дула өглһнә систем сәәнәр көдлсн бийнь ода школын герт йир киитн. Степной СПК-н медлд бәәх котельн бәәрн больницд, бичкдүдин садт болн школд дула өгчәнә. Ода деерән котельн сәәнәр көдлжәнә гиж района коммунальн церглтин көдләчнр келнә. “Степной” СПК-н ах инженер Петр Насоновин келсәр, коммунальн церглт энүнд гемтә биш, бешин тосн көрч одна, тегәд чигн дулан школд мууһар күрнә. Дегд ик халу өгхлә котельнд эвдрлт болх әәмшгтә гиж Насонов келнә.
Аһарин кемжән арвн — арвн негн градус киитнд шалдрнг түлән көрнә. Тегәд чигн турвасиг иим кевәр халулх кергтә болна. Инженермудын келсәр, эн котельн тәвн жилдән көдлжәнә. Тегәд чигн оборудовань хуучрв. Энүнәс көлтә шин котельн бәрх кергтә. Иим тосхлтд дала мөнгн һарна. Ода деерән болхла, бешин шалдрнг түлә хулдж авхин төлә района бюджетас мөнгн ирнә. Эн жилин дула өглһнә кемд нег сай арслнг һарв. Тегәд шин котельн бәрх арһ уга болжана. Тер мет иим му бәәдл бәәрн школын герт тогтв. Эн хуучн герт ора ясх кергтә, эрснь шуурв терз-үүдн бас дегд хуучн. Энд кесг жилдән капитальн ясвр кегдәд уга. Зуг бичкн ясвр кегдсмн. Хәләтн деерәс ик шалдар хуурад унв. Нег сәнь бичкдүд школд уга билә.
Школын директор Клара Дорджиеван келсәр, иим әәмшгтә бәәдлд бидн оньдин көдлнәвидн. Терз-үүдн бас хуучрв. Энүг эрк биш ясх кергтә гиж школын директор келнә.
Болв удл уга иим му бәәдл ясрх зөвтә. Эн жил федеральн программар эн школд Сарпинск районд федеральн программар капитальн ясвр кегдх. Энүнә төлә федеральн хазнас зурһан сай арслнг йилһж өггдх. Сарпинск РМО-н толһач Юрий Жуковин келсәр, тер мет района бюджетас нег сай арслнг бас йилһж өггдх. Сарпинск РМО-н администрацин толһач Юрий Жуковин келсәр, энүнд техническ көдлмш кегдх. Түлә халулдг эв-арһ кех. ода эн көдлмш экләд кежәнәвидн. Урдк жилмүд иим киитн болсн уга.
Ода болхла Шарнут селәнә сурһульчнр школ секхин күләжәнә. Района һардврин иткүлсәр, уд луга энд бәәдл ясрх. Ода болхла школын нег әнгд дулан ирнә, талдан халхд дулан күрчәхш.
Санкун Кермн, Очра Сергей
