Садовое селәнд бичкдүдин садт чеерүд уга

Тер саамд давсн жилд Садовое селәнд бичкдүдин төлә немр дөчн орм секв. Сарпинск РМО-н администрацин тоолврар, эннь давсн жилин сән күцәмжин негнь болв. Эндр өдрт Сарпинск районд дошкольн сурһулин учрежденьд орхин төлә зуг зурһан бичкдүдт чеерүдт зогсжана.

Виктория Пазухина эврәннь һурвн наста Максим көвүһән һурвн сарин эргцд садикт көдтлж авч иржәнә. Макситм бичкдүдин садт таасгджана. Энд олн нәәжән олж авв.

Виктория Пазухина келсәр, садт орхин төлә удан күләсн уга. Һурвн нас күрд көвүнь садт орж чадв. Немр баг секснәс иштә цуг бичкдүдиг садт орулж авх арһ учрв. Эк-эцкнр байрта бәәнә. Ода көдлмш хәәжәнә. Өрк-бүлд немр жалв орж ирх. Эннь сән керг. Көвүнь садт орснас авн медрл авчана. Энүнд сад таасгджана.

Сентябрин нег шинд Садовое селәнә бичкдүдин садт энүнлә хамдан дөчн көвүн-күүкн түрүн болж ирв. Ут-тоодан муниципальн дошкольн учрежденьд һурвн наснас авн зурюһан нас күртл хойр зун дөчн бичкдүд оржана. Эднлә арвн һурвн сурһмжлач болн зурһан специалист көдлжәнә. Тер тоод методист, логопед, хальмг келнә багш, физическ культурин специалист. Психолог Галина Медко давсн жилин сүл өдрмүдт эврәннь кабинетин төлә шин оборудовань авч. Удл уга специалистнр ирәд, энүг углж тәвх зөвтә.

Сентябрин нег шин күртл энд аһу ик көдлмш кегдв. Энүнә һардач Светлана Литвиненко келсәр, багшнр болн эк-эцкнр чидлән негдүләд көдлсмн.

Светлана Литвиненко келсәр, эн жил хот уудг хорад шинрүлж яслһна көдлмш кегдв. Энд ода халун болн киитн усн бәәнә. Цуг кергтә оборудовань бәәнә.

Бичкдүдин садын хуучн герт жирн долан трез сольгдв, пол шинрүлж ясгдв, кергтә залһлдан орулгдв. Ода бичкдүд туалетд һаза һархш.

Сүл цагт мана танһчд бичкдүдин садт орх бичкдүдин чеерүд жил ирвәс баһрад йовна.

Танһчин эрдм-сурһулин министрин дарук Ирина Кавкишеван келсәр, хойр минһн арвн негдгч жилд зун дөрвн муниципальн дошкольн учрежденьд арвн дундур минһн көвүн-күүкн оржала. Ода болхла бичкдүдин садт арвн һурвн минһн бичкдүдт оржана. Сүл хойр жилин эргцд хойр дундур минһн көвүн-күүкдин төлә немр багмуд секгдв. Эн жил арвн негн муниципалитетд бичкдүдин садт орх чеерүд уга кегдх.

Дошкольн эрдм-сурһулин учрежденьсиг дөннлһнә программар одахн Садовое селәнә бичкдүдин сад танһчин бюджетас хойр зун тәвн минһн арслнг авв. Эн мөнгәр медицинск оборудовань хулдж авгдв, цифрин пианино, һурвн көгжмин цутхлнг, ноутбук, логопедин кабинетин төлә оборудовань хулдж авгдв. Тер мет психологин чемодан, жөөлн инвентарь, хот кедг оборудовань бас энд бәәнә. Өдр болһн көвүд-күүкд шимтә хот-хоолар теткгджәнә. Бичкдүд болһнд района бюджет нег өдр далн зурһан арлснг йилһж өгчәнә. Района толһачин шоглсар, өдр болһн эдн дөрвн зун литр үс ууна.

Сарпинск РМО-н администрацин толһач Юрий Жуковин келсәр, урднь Сарпинск районд бичкдүдин садмудт орх бичкдүдин то олн билә. Чеерүд ик бәәсмн. Ода болхла эн хурц төр хаһлгдв. Ода районд бичкдүдин садт орх зурһан бичкдүд орхар чеерүдт зогсжана.

Болв энүгәрн района һардвр көдлмшиг зогсахар седжәхш. Администрацин толһачин келсәр, ода күсдундур сай арслнг кергтә. Эн мөнгәр садын герт үүд сольх зура бәәнә, наадлһна плошадк кех кергтә, тер мет садын герин эргндк аһу кеерүлхлә сән болх. Урднь эн бичкдүдин садт Маковкихна ах-дү ордг бәәсмн. Одахн Дмитрий баатр-зөрмг орденар ачлгдв. Волгоград балһсна вокзалд әмнә әрвллго олн улсиг харсв. Энүнә тускар Садовое селәнә улс сонсчкад, эннь эднә Дима гиж алмацсн уга. Ода баатр-зөрмг Димтрий Маковкинас бичкдүд үлгүр авч, бахмж кежәнә.

Хавтхна Элла, Хулхачин Николай