Сөөднь уульнцд харнһу болжана

Намрин кемд өдр ахрдад, танчһин әмтн гер талан харнһуд хәрж ирнә. Иим цагт хаалһст зеткртә йовдлмуд учрх әәмшг бәәнә. ГИБДД-н көдләчнрин келсәр, энүнә учрнь — балһсна хаалһст герл уга болжана. Элст балһснд хаалһин хажуд электрокүчнә зәрм шам шатжахш. ГОСТ-ын кемжәһәр иим шамын йирн тавн процентнь көдлх зөвтә.

Балһсн болһна кеерүлж сәәхрүлһнә нег ик чинртә халхнь — һза уульнцд, хаалһст болн талвнгд герл өглһн болжана. Сөөднь герл өгхлә, хаалһст көлгн-күчн әәмшг угаһарйовх, йовһн улс чигн санамр йовх арһ учрна. Сөөднь хаалһст болн уульнцст герл уга болхла зеткртә йовдлмудын то өснә, әмтн йовхд әәмшгтә болна.

Эн күүкнә келсәр, герл уга дегд харнһу болжана. Нег үлү, хотл балһсна захд дегд харнһу болжана. Эн залу күүнә келсәр, арвн хйор час күртл сөөднь Элстин цутхлнгд герл өгнә. Хотл балһсна захд болхла дегд харнһу. Эн күүкд күүнә келсәр, Осипенкон нертә уульнцд сөөднь дегд харнһу болна.

ГИБДД-н көдләчнрин келсәр, хаалһст учрдг зеткртә йовдлмудын то харнһу цагт асхн өснә. Уульнцд электрокүчн уцга болхла иим бәәдл улм муурна. Иим таалд жолач йоһвн кү үзхш, эс гиж хамгин аштнь үзнә. Иим цагт эрк биш зеткртә йовдлас гетлж болхш.

Эн жолачин келсәр, сөөднь хаалһ үзгдхш. Зеткртә йовдл учрхнь юмн уга. Эн маши залачин келсәр, иим хаалһар йовх әәмшгтә болна. Йовһн улст күн болна йовхд.

Үлгүрнь, Элст балһснд Ленина нертә уульнцд зуг хотл балһсна цутхлнгд герл бәәнә. Элстин захд болхла сөөднь харнһу болна. Бәәрн әмтн дассн хаалһар йовж чадна, талдан районас ирсн улс болхла күнд бәәдлд тусна. Тер мет Ставропольск болн Астраханск постмудас йовдг хаалһ бас харнһу. ГИБДД-н пост болн автомобильн рынкин хоорнд жолачнрт сөөднь йовхд күнд болна. Иим бәәдл Элстин дорд үзгт тогтв. Автомобилистнр тавн дуунад харнһу хаалһар йовх кергтә болна.

Элстин уульнцд герл өглһнә церглтин ахлач Степан Расстрига келсәр, ода иим хаалһс электрокүч өгдг арһ уга. Шишлнг оборудовань углж тәвх кергтә. Эн төр Элстин мэрийн бүртклһнд бәәнә. Эн хаалһ дегд ут. Иргчдән эн төр хаһлгдх.

Элст балһсна администрацин зәнглсәр, ода хотл балһснд зурһан минһн электрокүчнә шам бәәнә. Ада ртутн шамин ормд натрин шам тәвгджәнә. Иим шам сән герл өгнә. Уульнцд герл өглһнә мөнгиг муниципальн бюджет даажана. Элстин администрацин закврар уульнцд герл өглһн зураһар кегджәнә.

Степан Расстрига келсәр, ода хаһлх төр дала. Арһ-чидләрн зәрм төр халһгджана. Зунын кемд һаза электрокүчн сөөднь хойр час күртл өггднә. Үвлин кемд невчк эрт унтрана. Зуг өрүн эрт герл өгх кергтә болна.

Эн жилин арвн сарин эргцд Хальмг танһчд йоһвн улсиг дәврлһнә зун хөрн зурһан зеткртә йовдл хаалһд учрв. Элст балһснд зурһан күн әмнәсн хаһцв, зун тавн күн шавтв. Эднәс хөрн һурвн бичкдүд шавтсмн.

ГИБДД-н инспектор Игнат Куцековин келсәр, Элст балһсна администрац эн халхар зака эвджәнә. Сөзөднь һаза герл унтрах зөв уга. Зуг тәвн процентд электрокүч өгшго зака бәәнә.

Автомобильн хаалһсин туск федеральн закаһар сөөднь электрокүчнә установск эвдрхлә эс гиж элеткроснуһуг тасрхла герл өггдхш. Мөнгн ховр болсн учр тоод авгдшго. Ода эн төриг эс хаһлтл сөөднь хаалһин хажуһар йовсн йовһн улс бийдән герл өгдг элемент авч йовх зөвтә.

Гольдина Ирина, Эрнжәнә Эрднь