Элстин зарһд арвн негн күүнә тускар уголовн керг хәләгджәнә
Эндр Элстин зарһд Өмн үзгин федеральн округин аһуд күндәр зака эвдсн багин тускар сүүр болжана. Өмн үзгин федеральн округар Әрәсән МВД-н мөшклһнә әнг аврн негн күүнә тускар уголовн керг шинжлһнә көдлмш төгсәв. Эдн Хальмг танһчин, Волгоградын, Астраханск областин болн Чечнян республикин бәәрн әмтн. Эдн хойр минһн арвдгч жилин ноябрь сарас авн хойр минһн арвн хойрдгч жилин август сар күртл бу-селм хулдж болн маши, нефть хулхалж гиж гемшәгджәнә. Зарһин залд гемшәгджәх улсин элгн-саднь бәәнә. Келхд, эдн нег пистулиг тәвн — жирн минһн арслнгар хулддг бәәж, Калашниковин автомат болхла зун минһн арслнгар хулдж. Ут-тоодан эдн долан зун минһн арслнга бу-селм хулдв. Тер мет эдн “Лада” маркта зурһан маши хулхалж авч. Ут-тоодан эн кергәр зарһин дөчн хойр сүүр болв, тавн сардан керг хәләгдв. Эн цагин эргцд һучн долан герчиг мөшкж сурлһ кев. Уголовн керг һучн йисн боть тогтав. Эндр үдин хөөн гемшәгджәх улс зарһин шиидврәр ямаран засгла харһулгдхнь медгдх зөвтә.
