Полицин көдләчнр бичкдүдиг шин жилин байрла йөрәжәнә

Хальмг танһчд Полицейский Дед Мороз нертә цугәрәсән буйнч секдлин керг-үүлдвр эклв. Энүнә һол күцлнь — социальн күнд бәәдлд туссн бичкдүдт дөн күрглһн, эк-эцкин хәләвр уга бәх бичкдүдлә саглулгч керг-үүлдврмүд күцәлһн болжана. Хальмгин полицин көдләчнр Элстин социальн приютын көвүд-күүкдт дөн күргх. Иргч жил кесгтән эднә санлд үлдхин төлә иим керг-үүлдвр күцәгдх. Полицин көдләчнр социальн приютд, школмудт, дошкольн учрежденьд зурһан зун тәвн көвүн-күүк йөрәх.

Шин жилин болн рождественск байрин өмн өргнд МВД-н көдләчнр Полицейский Дед Мороз нертә буйнч седклин керг-үүлдвр бүрдәж давулжана. Эврәннь цергә хувцан соляд эдн туулсьин дүрмүдин костюм өмсәд, полицин көдләчнр арвн тавдгч тойгта шишлнг бичкдүдин садт одв. Полицин майор Владимир Лиджи-Горяев Киитн аав болв. Энүнә келсәр, иим дүр наадад дәкнәс бичкн цаган тодлв. Майор Наталья Глушанкова болхла киитн Аввин ач күүкн болв.

Полицин көдләч Владимир Лиджи-Горяевин келсәр, бичкдүдиг шин жилин байрла йөрәхд байрта болна. Эврәннь бичкдүд гиж санж.

МВД-н зәнглһнә цутхлнгин көдләч Наталья Глушанкован келсәр, иим кемд бичкдүдт байр белглхд йир сән болна. Бичкдүдин төлә бийән илвтә күн гиж тоолна. Эднд нөкд болад, сергмж өгхлә энүнәс даву байр уга гиж санжана.

Эднә келсәр, иим керг-үүлдвр бичкн көвүд-күүкд байр үүдәх зөвтә, эдн туульд иткәд, йосндан байрлх зөвтә. Иим керг-үүлдвр цуг Әрәсәд бүрдәж давулгдх. Дошкольн учрежденя көвүд-күүкд олн-зүсн шог марһаст орлцад, ду дуулад, би бииләд, шүлгүд умшв. Байрин нәр-нааднд цуг көвүд-күүкд орлцв. Дәкәд болхла бичкдүдин садт шин жилин байр гиж медицинск оборудовань белглв.

МВД-н көдләч Нина Чокаеван келсәр, дошкольн учрежденьд медицинск оборудовань белглхәр шиидж. Энүнә дөнгәр хорас цеврлгднә. Энүг олзлад, бичкн көвүд-күүкдиг эмнүлжәнә.

Байрин нәр-наадна хөөн дошкольн учрежденя бичкдүд шин жилин блег авв. Бичкдүд шин жилин байриг сергмжтәһәр тосв. Эннь полицин көдләчнрт хамгин сән ачлвр болв гиж келх кергтә.

Ээнән Делгр, Котина Валерий