Киитн Сиврт үлдсн өвкнрин санл тодлжана
Төрскн һазрасн салад арвн һурвн жилдән бәәв. Декабрин хөрн нәәмнд хальмг улс цаажла харһсн далдгч жилин һашута өөн күцжәнә. Эн өдр хальмгудын цуг өрк-бүлмүдт хол киитн Сиврт үлдсн улсин санл тодлж зул өргх. Мучкаевихна өрк-бүлд тууврин цагт хол һазрт мөнкинд үлдсн элгн-садан бас тодлх.
Дөчн һурвдгч жилин декабрь сард йисн наста Коля Мучкаев эврәннь эктәһән, дү күүктәһән болн дү көвүтәһән хамдан хальмг улсла Сиврт нүүлһгдсмн. Эцкнь дәәнд әмнәсн хаһцв. Хаалһдан догшн киитнд даарх болн өлсх-харһнх саам учрв. Энүг мөнкинд мартшгов гиж Николай санджиевич келнә. Эднә өрк-бүл Манц селәнәс һарч йовж.
Эдниг Тюменск областин Ялуторовск районд авч ирв. Экнь Цедн Хаоджиеван һахасин фермд көдлв, хөөннь колхозд саальч бюолж көдлсмн. Арһ-чидләрн өрк-бүлән тежәв. Дөчн зурһадгч жилд гемин уршгар дү көвүнь өнгрв. Тиигхд кесг әмтн күнд көдлмшәс көлтә болн өлсәд-харһнад өнгрсмн. Бичкдүд бөдүн улсла хамдан кеер һарда, давсн жилин көрә юоднцг малтж авдг бәәж. Намрин кемд урһц хурасна хөөн колоски түүдг билә. Николай Мучкаевин келсәр. экнь һанцхарн өрк-бүлән тежәхд күнд болад бәәв. Тегәд тенд тууврт бәәсн цагт белүсн залу күүнд мордв. Эн күн экднь болн бичкдүдт дөн-түшг болв. Хөннь дәкәд һурвн үрн төрв.
Николай Мучкаевин келсәр, школд зуг дөрвн класс төгсәв. Энүнә хөөн экләд көдлв. Тиигхд гесән тежәх кергтә билә, сурһуль сурдг арһ уга бәәж. Хөөт эцктәһән мал хәрүлв.
Лола поселкин Кетешевихна өрк-бүл бас Тюменск областьд тусж. Амра Цереновна келсәр, тиигхд зуг һунта бәәж. Төрскн һазрасн яһж һарч йовсн тускар экин келснәс меднә.
Хөрн дөрвн наста күүкд күн нилхдәһән болн хойр дүүтәһән Беркут поселк күртл күрч. Тенд талдан хальмгудла хамдан баракд орулв. Хальмгуд хоорндан ни-негн билә, нег-негндән нөкд болдг бәәж. Бәәрн улс тууврт бәәсн улст бас дөн күргдг билә, хувц-хунрарн болн хот-хооларн хувалцдг бәәж. Дөчн доладгч жилд Кетешевихн Южно-Сахалинск балһснд нүүв. Экнь Кермн Потняевна болн энүнә ахнь тоосхин заводт көдлмшт орж көдлв.
Тәвн доладгч цаажла харһсн улсин нерн цеврлгдв. Иим байрта зәнг сонссн хальмгуд байрлад, ууляд төрскн һазртан шулуһар хәрхәр зүткв. Мучкаевихна өрк-бүл Доцнг поселкд ирж буув. Тенд тууврин хөөн Кетешевихна өрк бүл бас нүүж ирв. Тәвн йисдгч жилд Николай Санджиевич болн Амра Цереновна ханьцад, өрк-бүлән өндәлһв. Ода долан үртә, арвн хойр ач-зеетә, тавн жич-зеенчртә. Декабрин хөрн нәәмнд эдн цугтан хамдан цуглрад, киитн Сиврт үлдсн өвкнриннь санл тодлх.
Баира Петрова, Котина Валерий
