Полицд видеокамер сән дөн болжана
Өдгә цагин балһсн ямаран болх зөвтә? Энүнд олн-зүсн систем, тер тоод көлгн-күчнә, телекоммуникационн, электро болн усар тетклһнә эв-арһ бәәх зөвтә. Эдн цугтан хоорндан залһлдата. Эднә көдлдмш бүрткхин төлә, күн болһн әәмшг угаһар бәәлһнә төлә шишлнг программ кергтә. Иим Әәмшг уга балһсн нертә программ Әрәсән балһсдт, тер тоод Элст балһснд сән кеәвр күцәгджәнә.
Өдгә цагт ик балһсдт бәәдл-жирһлин йовуд дегд түргн. Иим таалд әәмшг уга бәәлһнә шин систем бүрдәх неквр тәвгджәнә. Иим эв-арһин нилчәр балһсна инфраструктурмудын көдлмш чанһ бүртклһнд авгдх зөвтә, балһснд болжах цуг йовдлмудыг шинжлж хәләх кергтә. Әәмшг уга балһсн нертә программ Элст балһснд хойр минһн нәәмдгч жиәс авн экләд күцәгджәнә. Тер жилд базин станц болн арвн һурвн видеокамер углж тәвгдв. Энүг олн әмтн цуглрдг һазрт тәвж. Дотр-дундын кергүдин органм удын оперативн церглтин үүлдврт өдгә цагин некврлә ирлцәтә иим эв-арһ олзлһн әәмшг уга бәәлһнд сән нилчән күргхнь лавта. Видеокамер углж тәвснә хөөн зака эвдсн долан зун йовдл гетлүлгдв. Арвн негн зака эвдсн йовдл илткгдв, хаалһд зун зеткртә йовдл темдглж авгдв.
Элст балһсар МВД-н заллтин дежурн әнгин ахлач Эрдни Гендеевин келсәр, зака олар эвддг һазрт, хаалһст олн зеткртә йовдл болдг бәәрнд иим камер тәвгднә. Ода сән чинртә камер углж тәвлһнә төр хаһлгджана. Энүг полицин көдләчнр эврәннь церглтд олзлж чаджана.
Шин секгдсн цутхлнгд Элст балһснд көдлжәх цуг видеокамерас зург ирнә. Полицин көдләчнр шуд эфирт хотл балһсна булнг болһниг шинжлж хәләжәнә. Кемр зака эвдсн йовдл учрхла инспектор тер дарунь полицин көдләчнриг йовулна. Талдан мониторт балһсна карт үзж болх. ГЛОНАСС системин нилчәр госавтоинспекцин цуг машид хәләж болх. Эрдни Гендеевин келсәр, зака эвдсн йовдл эс гиж хаалһд зеткртә йовдл учрхла тер дарунь энүнә туск зәнг дежурн әнгд күрнә. Тедн полицин көдләчнриг йовулна. Иим эв-арһ полицд сән дөн болжана.
Хотл балһснд углж тәвгдсн видеокамерт элстихн оньган өгчәхш. Иим камер супермаркетмудт, банкмудт болн государственн учрежденьст бәәнә. Эдн цуг халхаснь шинжлт кежәнә. Эн көвүнә келсәр, зәрмдән камерин шинжлтд орх дурн күрхш. Зуг әәмшг уга бәәлюнә төлә иим шинжлт кергтә. Ода олн-зүсн зеткр учрна. Камерин нилчәр цугинь хәләж шинжлж болх гиж күүкд күн тоолжана.
Видеошинжлтин системин делгрлтин төлә Хальмгин МВД-н седәврәр Элст балһсна мэрийла хамдан Әәмшг уга балһсна нертә программ белдж батлж авгдв. Энүнә төлә арвн нәәмн сай арслнг йилһж өггдх. Иргчдән иим видеокамермуд танһчин райодт бас углж тәвх зура бәәнә.
Дмитрий Ивахненко, Ирчин Алексей
