Баһ наста багшнрин марһан болх
Баһ наста багшин бенефис. Элст балһснд баһ наста педагогмудын марһан болх. Энүнд эдн эврәннь методическ эв-арһан үзүлх. Эрдмин үүлдврт олзлжах шин эв-арһсин тускар баһ наста багшнр келж өгхмн.
Англь келнә багш Тамара Шараева марһанд орлцхин төлә эврәннь материалан орулж өгв. Школд зуг тавн сардан көдлжәнә. Дамшлт хоршаһад уга, тер бийнь эврәннь эрдмин билгән үзүлх саната. Жюрин оньгт нег кичәлин материал тусхах. Энүнд наадар дамжулад, сурһульчнр медрл өгнә, эрдм-сурһулин өдгә цагин шин эв-арһ олзлв. Иим кевәр бичкдүд медрл авхдан дурта. Англь келнә багш Тамара Шараеван келсәр, марһана өмн үүмжәнә. Тер бийнь баһ наста багшнрт иим оньг тусхаснд барлжана. Иим марһан эрдм-сурһулин баһ наста көдләчнрт көдлмштнь урмд өгх.
Марһанд Тамара Васильевнаг энүнә сурһульчнрнь болн хамдан көдлжәх багшнр дөннхмн. Иим марһан Хальмг танһчд эрдм-сурһулин көдләчнрин мергжлт өөдлүлһнә танһчин инсититуын седвәрәр түрүн болж бүрдәгдж давулгджана. Институтын ректор Лилия Мунчинован келсәр, иим медрлин марһанл багш болһн эврәннь билг-эрдәмн үзүлж чадх. Школд һурвн жиләс даву көдлжәх эрдм-сурһулин цуг көдләчнр марһанд орлцж чаджана. Институтын ректор Лилия Мунчинован келсәр, ода иим баһ наста багшнр ик дамшлт хоршаһад уга. Талдан улсла дамшлтарн хувалцж чадшго. Болв маднд эднә үүдәгч хәләц кергтә. Цаг тәвжәх неквриг яһж хаһлхнь соньн болжана.
Мунчинован тоолврар, өдгә цагин багш зуг эврәннь сурһулин предметар көдлсн деерән, талдан чигн халәар соньмсх зөвтә. Эндр өдр көвүд-күүкдт зуг хоосн медрл керг уга. Өдгә цагин баһчуд уха тунһаж, дасжах предметан цуг халхаснь шинжлж медх зөвтә. Энүнә төлә багш эврәннь көдлмштән бас өвәрц соньн эв-арһ олзлх зөвтә. РИПКРО-н ректор Лилия Мунчинован келсәр, иим марһан баһ наста багшнрин седәвр делгрлүһнд туста болх. Баһчуд көдлмшин түрүн өдрәс авн багшнрин шин үйнрин чинр зүүх зөвтә. иим багш уха түнһаж, ухан-медрлән сурһульчнрт өгч чадх зөвтә.
Марһана темдг гиж глобус шүүж авгдв. Эннь моһлцг һазрин темдг болжана, нисж йовх самолет болхла үүдәлтин межә уга гисн темдг үзүлжәнә. Марһанд хамгин сән көдлмш үзүлсн багшнр мана танһчин нер межрегиональн дөрлдәнд харсхмн.
Ээнән Ольга, Хулхачин Николай
