Петр Надбитов төрскн һазртан одв
Ончта өөнин өмн өрнгд танһчин нертә искусствин үүлдәч Петр Надбитов төрскн һазртан Ик-Буурла района Көвүд поселкд одв. Энүнә һарджах Өөрднр нертә бииһин государтсвенн театр хамгин сән гисн программан үзүлв. Тер тоод олнд таасгдсн "Чичрдг", "Дөрвдә товшур" би биилв, талдан чигн өвәрц би бииләд, селәнә улсин байрлулв.
Хальмгин нертә биич Петр Тимофеевич Надбитовин 75 ончта өөнд нерәдж, өсәд-боссн Көвүдә һазрт ик байр болв. Селәнә әмтн ик бичкн уга цуһар отг-әәмгиннь нерән туурулж йовх билгтә үүрән байртаһар тосв.
Нертә биичиг Көвүдәхн ормасн босж, альхан же гитлән ташж тосжана. Селәнә сойлын гер олн әмтәр дүүрв. Бәәрн әмтн ик — бичкн уга цуһар отг-әәмгиннь нерән туурулж йовх билгтә үүрән 75 жилин өөнләрн йөрәхәр ирсмн. Петр Тимофеевич Надбитов — эн һазра күн болв чигн, энүнд даңгин нааран ирдг цол уга болна. Болв Петр Тимофеевич эврә өссн-боссн һазра улсиг альд йовв чигн мартхш. Тавн жил хооран 70 жилин өөнән Надбитов бас нааран ирәд, концерт тәвәд темдгллә.
Эн Көвүд гидг селәнд Петр Надбитовин бичкндк цаг давсмн. Энд төрж һарад, тавн нас күртл бәәсмн. 4З-гч жилд цуг хальмг улс Сиврт туугдад, бас кесг зовлң үзв. Сиврт ирәд, тенд Полтавск районд бәәршв. Надбитов тенд дунд школан төгсәв. Хам-хоша бәәдг Первомайское селәнәс ирсн Эмгнә Владимир Надбитовин өрк-бүллә хамдан Сиврт нег һазрт йовсмн, бичкн Петр школд яһж сурсна тускар маднд келж өгв.
Петр Надбитов кесг хальмгин үйин әмтнд үлгүр-үзмж, омг болж йовна гиж сцен деерәс үг келсн әмтнә ик зуунь темдглв. Көвүдәхн ик-бичкн уга Петр Надбитовин үүдәгч хаалһар даңгин соньмсна. Школын ул деер билгтә биичд нерәдгдсн музей секгдсн бәәнә. Музейд Петр Тимофеевич Надбитовин бәәдл-жирһлд нерәдгдсн кесг соньн тоот үзж болхмн.
«Өөрднр» гидг бииһин театр эн өдр хамгин сән программан үзүлв. Энүнд "Дөрвдә товшур", "Чичрдыг", цыган келн-улсин би үзәд, нүднә хәләцән байрлулж чадв. Петр Надбитов дәкәд нег сәәхн белг белглж гиж келж болхмн. Сойлын герин өөр туя модд эн тәрв. Кесг жил давад, эн ормд олн модд урһх гиж бәәрн әмтн нәәлцжәнә. Юңгад гихлә Петр Надбитовин һар күрсн ямаран болв чигн керг эрк биш сән йовдлд тохрагдна.
Көкән Герл, Мятежный Максим
