Бичкдүдин фестиваль болв

Билг-эрдмин фестиваль болв. танһчин бчикдүдин үүдәлтин бәәшнгд гала-концерт олну лс хәләж чадв. Энүнд зурһан наснас авн арвн долан нас күртл уйн наста артистнр билг-эрдмән үзүлв. Эдн Ик-Буурла болн Хар һазра райодын элчнр.

Аминат Магамедова Хар Һазра районас ирв. Билгтә сурһульч хальмг келәр Әәт майор ду дуулж өгв. Эн дууна туужин тускар олн улс меднә, нег үлү төрскән харсгч дәәнд орлцсн улс энүг сәәнәр тодлна. Дуунд Баһ Дөрвдә улсин, Цаһан Нуура селәнә советин Марл хотнд төрсн Әәд Хожаевин тускар келгджәнә. Аминат дуулсн дун олн улсин зүрк авлв. Тегәд чигн энүг кесг әмтн кесгтән альхан ташж ханлтан өргв. “Вокал” номинацд Аминат хойрдгч девснгин лауреатын нер зүүһәд, үнтә мөрәһәр болн дипломар ачлгдв.

Аминат Магамедован келсәр, бичкнәсн авн дуунд дурта. Фестивальд ик кезәнәс авн белдвр кеж.

Хореография номинацд болхла Комсомольский селәнә Цецг ансамбль болн Ик Буурла района Торһа ансамбль нүүрт һарв. Хальмг улсин “Чичрдг” би әмтнд байр үүдәһәд, хәләһәчнрин зәрмнь уйн наста артистнриг дахад биилв. Ассалам ансамблин бичкн артистнр болхла “Лезгинк” биилж өгв. Эдн аштнь хойрдгч девснгин лауреатнр болв.

Эн күүкнә келсәр, талдан бичкдүдлә харһад таньлдв. Талдлан ансамбльмуд хәләһәд, дамшлт хоршана. Эн көвүнә келсәр, эндр лезгинк би биилж өгв. Энүнд залу улс чанһ-чииргән чидлән медүлнә, күүкд улс болхла ке-сәәхнән үзүлх зөвтә.

Жил болһн болдг иим фестиваль марһан райодт билгтә бичкдүдиг йилһж авхд сән нилчән күргнә, билгтә көвүд-күүкдиг дөннхд туслна. Энүнә спонсорнь болж нефтин компань мөгнгә дөн күргжәнә. Бичкн билгтә көвүд-күүкдт болн эднә багшнрт иим фестиваль йоста ик байр болна. Уйн наста артистнр цуг билг-эрдмән үзүлхәр зүткнә. Иим фестивальин йовдт эдн шин нәәжнрән олж авна.

Танһчин бичкдүдин үүдәлтин цутхлнгин директор Ирина Очирован келсәр, иим фестиваль марһана һол күцлнь — билгтә бичкддүиг йилһж авда, эднә билг-эрдминь делгрүлһн болжана. Иим марһан һурвн номинацар болна, Эннь вокал, бииһин болн зевсгүдин номинац.

Бүрдәһәчнрин келсәр, жил ирвәс билгтә көвүд-күүкдин то өсәд йовна. Жюрин гешүд хамгин түрүнд бичкдүд яһж сцен деер бийән бәржәхинь шинжлж хәләнә. Тер мет дурта эрдмдәрн делгрлт авх санан бас тоод авгдна. Бичкдүдин зәрмнь иим эрдмәр насни туршт көдлх зурата.

Жюрин ахлач Галина Манджиеван келсәр, фестивальд орлцсн бичкдүд дурта эрдмәрн икәр соньмсж билг-эрдәмн үзүлв. Дорас өсж йовх баһчуд эврәнн төрскн келән унг-тохман мартлго, сергәжәхнь сән кег болжана.

Фестивальд орцлсн цуг бичкдүд белг уга үлдсн уга. Иим керг-үүлдвр сән зангшалд тохрв. Ода уйн наста билгтнр эврәннь багшнртаһан хамдан иргч жилин программ экләд белджәнә.

Ээнән Делгр, Бадмаран Владислав