Пенсионн сангд видеозалһлдана эв-арһар пресс-конференц болв
Эндр региональн болн райодын олнд зәнглһнә эв-арһсин журналистнрла Әрәсән правительствин күч-көлснә болн социальн харслтын министрин дарук Андрей Пудов болн Әрәсән Пенсионн сангин парвляна ахлач Антон Дроздовин пресс-конференц болв. Видеозалһлдана эв-арһар эдн хойр минһн һучдгч жил күртл пенсионн системин делгрлтин туск һол чинрин тускар цәәлһвр кев. Күүндврт Әрәсән цуг регионмуд орлцв. Шин реформин йовудт пенсин кемжән өслһнә керг цаарандан күцәгдхмн. Әрәсән пенсьт һарх насн икдүлгдшго. Эн туст хүврүлһн һурвн кемжәһәр болх. Эннь күч-көлснә пенсь, предприятьмудын тогтасн корпоративн болн эзнә пенсь. Энүг күн болһн эврән тогтах зөвтә. Шин реформар олн дунд болсн күүндврин йовудт олн әмтн сурврмуд өгчәнә. Үлгүрнь, кегс улс күч-көлснә стажин тускар соньмсжана. Дөчн жилдән жалвасн хөрн процентинь пенсин тоод йовулсн көдләч хөрн жилин туршарт жалвин дөчн процент пенсь авч чадхмн. Тегәд пенсин хамгин ик кемжә авхин төлә кергтә күч-көлснә стажиг көдләч зуг жирн настадан тогтах.
