Көтчнр селәнд “Ромашка” нертә бичкдүдин сад секгдхмн
Көтчнр селәнд цөн өдр болад “Ромашка” нертә бичкдүдин сад экләд көдлхмн. Ясврин көдлмш энд төгсхдән өөрхн. Капитальн ясврин көдлмш бәәрн района бюджетин мөнгәр кегдв. Удл уга района цутхлнг селәнд бәәх зу һар бичкн көвүн-күүкн у-сарул болн дулан садт орж чадхмн.
Эн хойр давхрта гериг тәвн жил хооран тосхсн бәәж. Тиигхд энүнд бас дошкольн учреждень көдлжәсн билә. Тегәд шишлнг кевәр бәрсн гериг бичкдүдин садын төлә ирлцүлх төр тәвгдсн уга. Энүнә хөөн эн герт эклц школ бәәсмн. Болв сүл жилмүдт гер эжго бәәв. Тегәд района һардачнр энүг шинрүлж ясад, дошкольн учреждень хәрү нааран орулхар шиидв. Герин һазак болн эргндк аһу хәләхлә, энд күцәх көдлмшин кемжән дегд ик болжана. Тер бийнь ясврин көдлмш энд эклв. Эннь бас учрта, юнгад гихлә хуучн гериг ик кезәнә шинрүлх кергтә бәәсмн. Өдгә цагт герин дотрк ширдәд цаһалһжана. Энд капитальн ясвр кехин төлә бәәрн района бюджетас күсдундур сай арслнг йилһж өггдв. Ода эн герт усна сурвлжн орулгдв, дула өглһнә систем углж тәвгдв, канализац бәәнә. Тер мет садын хорасиг шинрүлж ясв, шин терз-үүд тәвж. Үлдсн ясврин көдлмшиг цөн өдр болад төгсәх. “Ромашка” нертә бичкдүдин садын һардач Наталья Учаеван келсәр, нег жил хооран наран ирхлә, энд дегд му дүрстә билә. Цуг кергтә мебель болн инвентарь хулдж авгдв.
Көтчнрә района муниципальн бүрдәцин ахлачин дарук Геннадий Азотовин келсәр, бичкдүдин садмудт чеерүд баһрулхин төлә хуучн гермүд шинрүлх кергтә. Зуг иим кевәр эн хурц төриг хаһлж болх. Бичкдүдин садын шин гер ода деерән тосхгдг арһ уга. Района цутхлнг селәнд ода зуг ор һанцхн сад көдлжәнә. Энүнд цуг бичкдүд орж чаджахш. Тегәд арһ уга немр орм һарһж авх кергтә болв.
Көтчнрә РМО-н ахлачин дарук Геннадий Азотовин келсәр, ода иим бичкдүдин садмуд Чкаловин нертә селәнд школын улд болн Һашун Бурһс поселкт бас дунд сурһулин ул ддер иим сад секх зура бәәнә. Юнгад гихлә, эн школмудт сурһульчнр то баһрв, хорас сулдв. Ода садт орх эк-эцкнрин зун эрлһн бәәнә. Хойрдгч садын гер көдлхлә чеерүд баһрхмн, тер бийнь эн төр күцц хаһлгдад уга.
Тегәд чигн “Ромашка” нертә сад экләд көдлхиг эк-эцкнр болн бичкдүд тенкән уга гидгәр күләжәнә. Шинрүлгдсн дошкольн учрежденьд йирн тавн бичкдүд орж чадхмн. Болв энд немр орм һарһсна хөөн, зун хрн көвүд-күүкд энд ирж чаджана. Экнрин тоолврар, хамгин түрүнд һурвн наста бичкдүдиг наарна орулх кергтә. Юнгад гихлә, Әрәсән закаһар һурвн нас күрсн үрдүдтә экнр көдлмштән һарх зөвтә. Болв зәрм экнр иим болзг күләлго, үрдүднь күсдундур жил болхла көдлмштән һарна. Иим кемд эдн государствас дөнцл мөнг авхш. Һурвн наста Герл күүкнә экнь Наталья Дорджиеван келсәр, Ромашка нертә бичкдүдин садт орм өгснд ик байрта бәәнә. Наталья Дорджиеван келсәр, үрән һарһсна хөөн хойр жилдән гертән суулав, көдлмштән һарч чадсн уга. Ода болхла ик байр болжана. Садт орхар белдвр кежәнәвидн.
Бичкдүдин садмудт орм дутжах төр хаһлх Әрәсән президентин өгсн даалһвриг Көтчнрә района администрац иргч жилд күцц хаһлх саната. Октябрин чилгчәр болхла шинрүлгдсн садын герт дулан болх, энд бичкн көвүд-күүкдт цуг кергтә таал бүрдәгдхмн.
Ээнән Ольга, Хулхачин Николай
