Оютнрин үүдәлтин марһан болв

Виват студент! Элст балһснд оютнрин үүдәлтин фестиваль давулгджана. Энүнд най һар оют олн —зүсн номинацд орлцад хойр өдрин эргцд эврәннь билг-эрдмән үзүлх. Дууһин, бииһин һарин эрдмин , художествен үүдәлтин болн нань чигн халхар ончрхнь төлә дөрлджәнә. Хамгин аштнь гала-концерт болх.

Иим фестиваль Хальмгин университетд түрүн болж бүрдәж давулгджана. Энүнд оютнр олн-зүсн марһаст эврәннь билг-эрдмән үзүлж чадх. Эдн дуулх, биилх, көгжмин зевсгүдәр наадх талдан чигн дөрлдәнд дииләчән йилһхмн. Фестивальд орлцачнр дүнд хамгин түрүн болж иим керг-үүлдврт орлцжах көвүд-күүкд бәәнә, урднь иим фестиивальд орлцсн дамшлтта оютнр бәәнә. Амулнг Дорджиева дамшлтта артистк. Москва балһснд болсн оютнрин фестивалин дииләч болв.

Оютн Амулнг Дорджиеван келсәр, күн болһнд нуувч билг-эрмд бәәнә. Энүг илткж секх кергтә. Фестивалин цуг орлцачнрт үүдәлтин күцәмж бәрхинь дурджана. Эднә хаалһнь цаһан болтха.

Марһан жюрин ханьд Петр Чонкушовин нертә искусствин училишин багшнр орв. Эдн хамгин сән дуучнриг, биичнриг, көгжмин зевсгүдәр хамгин сәәнәр наадсн баһчудыг болн талдан чигн билг-эрдмин дөрлдәнә дииләчнриг йилһж авх зөвтә. Иим марһас билгтә көвүд-күүкд билг-эрдмән үзүлх арһ өгнә. Институтын оютнрин хүүвин ахлач Анастасия Гудина келсәр, эднә институтд билгтә баһчуд дала. Иим фестивальд сән үзмж бәрхинь күләжәнәвидн.

Фестивалин һол күцлнь — оютнрин үүдәлтин билг-эрдм йилһж авлһна төр тәвгджәнә. Баһчуд сул цаган олз-тустаһар давулһна керг күцәгджәнә гиж институтын директор Гилян Айдарова келнә. Ода институтд долан зун көвүн-күүкн сурчана. Эднәс ик зунь билг-эрдмтә.

Институтын директор Гилян Айдарован келсәр, эдн профессиональн дууч, биич эс болв чигн, иргчдән эдн сән юристнр, бухгалтермуд болж һарх. Эврәннь көдлмшән үүдәгч кевәр күцәх.

Фестивалин ашт ик гала-концерт болх. Энүнә дииләчнр Москва балһснд болх оютнрин үүдәлтин фестивальд орлцх зөв авхмн.

Бевина Мергн, Эрнжәнә Эрднь