Оютнр цусан өгв

“День донорского совершеннолетия”. Иим нерәдлһтә керг-үүлдвр эн өдрмүдт цуг Әрәсәд күцәгджәнә. Эндр хальмгин университетин герин өөр өрүн нәәмн часас авн цус авдг мобиль цутхлнг көдлв. Оютнр цус өгхин төлә сурһульдан невчк эрт ирв.

Хальмгин университетин герин өөр зогссн ик машиг оютнр болн багшнр өрүн эртәс авн үзв. Оют Вадим Довгаевин келсәр, өдгә цагт Әрәсәд гемтә улсин эмнүлхин төлә цусн болн энүнә компонент эс күртжәхинь медәд, цусан өгхәр ирв. Иим керг-үүлдврт орлцх улсин тоод эн көвүн түрүн ирж. Цусан өгхин өмн цуг кергтә шинжлт кев, талдан чигн цааснд һаран тәвв. Тер мет энүг эмч терапевт шинжлж хәләв.

Оют Вадим Довгаевин келсәр, гемтә улст цусн кергтә болна. Тегәд иим улст нөкд болх кергтә. Цусн кергтә улст баһчуд дөн күргхлә сән болх.

Цусан өгх керг-үүлдврт кесг зун оютнр ирв. Цусан өгсн хөөн эдн ирлцнһү сертификат авв. Эн иткүлин цаасн түрүн болж цусан өгсинь герчлжәнә.Нег часин эргцд эмчнр дөрвн лииттр цус цуглулж авв.

Эн көвүнә келсәр, ода мана танһчд цусн баһ болжана гиж эднд келж. Тегәд гемтә улст дөн күргхлә буйнч седлктә керг болх. Талдан халхаснь цус өгхлә, цог-махмуд шинрнә. Көвүнә темдглсәр, ода невчк үүмжәнә. Түрүн болж цусаг өгчәнә. Күн болһн цусан өгәд, талдан улст дөн күргх. Иргчдән дару-дарунь цусан өгәд, күндтә донор болх зура бәәнә.

Иим керг-үүлдвр Хальмг танһчд һурв дәкж бүрдәж давулгджана. Специалистнрин тоолврар, иим кевәр эдн хурц төрт баһчуд оньг тусхах гисн нәәлвртә бәәнә. Иим төр ода дегд хурц. Тегәд күн болһн иим керг-үүлдврт орлцх күцл тәвх зөвтә. Эмчнрин келсәр, эднәс зәрмнь күндтә донор болж чадхмн.

Хальмг танючар доносрк жисәнә делгрлтин специалист Баатр Анюшевин келсәр, жил ирвәс цусан өгдг оютнрин то өсәд йовна. Эннь сән керг болжана. Зәрм көвүд-күүкд ховр цуста. Эннь һурвдгч багин цусн. Ода үүмх керг уга, иим ьагин цусн мана танһчд бәәнә.

Эндр цусан өгсн баһчуд күнд гемтә улст дөн күргв гиж келж болх. Цус авдг мобильн станц хотл балһсна талдан чигн сурһулин заведеньд одх зурата.

Ээнән Делгр, Очра Сергей