Олн халхта цутхлнг Элстд көдлжәнә

Элст балһснд олн халхта цутхлнг көдлжәнә. Долан хонгт специалистнр хойр минһн күүнд государственн болн муниципальн туслмж күргнә. Кесг жилдән кергтә цаас һарһж авхин төлә түржәсн әмтн ода ахр болзгт документан һарһж авчана. Шин цутхлнгин көдлмшиг элстихн таасжана.

Элст балһснд олн халхта цутхлнг эн жилин январь сард секдглә. Мана танһчд нег терзин эв-арһар көдлдг түрүн учреждень болв. Цуг кергтә көдлмшиг, цәәлһвриг, документ цуглулһиг, эдниг организацст йовулһиг ахр болзгт нег специалист күцәнә. Ода олн халхта цутхлнг государственн болн муниципальн тәвн туслмж күргжәнә. Специалистнрин келсәр, хамгин олн улс паспортан сольхар, өрк-бүлин ханин туск справк авхар ирнә. Тер мет өолн үртә өрк-бүлмүдт һазрин участк эзнә медлд орулһна керг олн улст кергтә болжана.

МФЦ-н ах специалист Ольга Свечкареван келсәр, август сарас авн росресстрин туслмж экләд өгчәнә. Эннь патьрмудыг эзнә медлд орулһна документ кеж өгнә. Тер мет олн-зүсн справк һарһж өггднә. Жилин чилгч күртл Пенсионн сангин туслмж күрггдх, миграционн церглтин нег туслмж авч болх. Ода муниципалитетла туслжм икдүлһнә тускар көдлжәнә.

Хотл балһснд иим цутхлнг кергтәнь олн улс иржәхнь ил герч болжана. Кесг минһн күн нааран ирәд, эдниг үүмүлжәх төрмүдән хаһлж чадв. Олн халхта цутхлнгин көдләчнр универсальн специалистнр болжана. Эднә күн болһн олн-зүсн төрмүдәр цәәлһвр өгч чадх, кергтә документ һарһж өгнә. Эднә көдлмшиг элстихн өөдәнәр үнлжәнә. Тер тоод пенсионерк Лидия Дедович. Олн халхат цутхлнгд кесг дәкж ирәд, кергтә туслмж авсндан байрлжана.

Пенсионерк Лидия Дедович келсәр, патьрна эзнә медлд орулж авх санан бәәнә. Ода документан орулж өгчәнә. Специалистнр тевчнһү, һольшг сән зангта. Туслжм сән чинртәһәр күргнә.

Элстин олн халхта цутхлнгин үүлдврин һол күцлнь — документ ахр болзгт кеж һарһлһн болжана. Ода цутхлнгин дөнгәр туслжм авлһна керг амрар күцәгднә, цаг әрвлгднә, мөнгн чигн баһар һарна гиж хотл балһсна әмтн келнә. Эн күүкнә келсәр, түрүн авгтан цутхлнг сексн цагт дегд эвтә болсн уга. Ода болхла кергтә цаас ахр болзгт авх саната. Эн залу күүнә келсәр, энд чеерүд уга болна. Эннь сән, цаган әрвлж болжана.

Тер мет иим олн халхта цутхлнгуд танһчин райодт секх зура бәәнә. Удл уга иим учреждень Көтчнрә болн Городовиковск райодт көдлхмн.

Ээнән Делгр, Хавтхна Анатолий