Октябрьск района Хошеут селәнд бәәх спортивн заалын ясврт зурһан сай арслнг кергтә

Октябрьск района Хошеут селәнд бәәх спортивн заалын ясврт зурһан сай арслнг кергтә. Аварийн бәәдл тогтснас иштә эн зал 2009-гч жил хаагдсн болдг. Иим шиидвр Роспотребнадзорин заллтын специалистнр шинжлж хәләснә хөөн авсн болдг. Тегәд физкультурин кичәл эдн давхш. Программас дутшгон кергт багшнр ямаран эв-арһ олв?

Мана үүдәгч баг селәнд ирсн цагт багшнр заалын үүд секч үзүлв. Мана оператор залын эрсин шуурха, нурад унн гижәх ораһинь зурглж авчасн кемлә көвүд дарунь мяч авч волейбол наадхар зүткцхәв. Шидр районд давсн волейбольн марһанд эдн дөрвдгч орм авсмн. Спортитвн зал уга болад бидн иим үзмж бәрвдг гиж эдн һундрхж келнә.

Үвлин кемд эдн эклц школын наадна хорад физкультурин кичәлән давулна. Эн хора зөвәр бичкн болв арһ уга гиж физкультурин багш Петр Шуняев келнә. Нег үлү эн жил физкультурин кичәлин цаг немгдсн бәәнә, ясвр кедг мөнгн уга. Хуучн заалд кичәл давудна гидг зөвәр әәмшгтә юмн гиж багш цаарандн келнә.

Эн хүүчн спортивн зал 1978-гч жил тосхгдсмн. Энүг шишлнг проект угаһар оютнр тосхсн болдг. Эрснь хуучрсн ашт электрокүч орулдг суннһуд эдлврәс һарв, дула орулдг систем уга, күүкд-көвүд хувц-хунран сольдг хора бас уга. Школын директор Майя Бадышеван келсәр, физкультурин кичәл давулдг салу шин бәәрн кергтә, энүнә кергт зурһан сай арслнг мөнгн керглгджәнә. Эн халхар района депутатнрт кесг цаас йовуллавидн гиж школын һардач келнә.

Иим бәәдлд туссн бйнь селәнә школын сурһульчнр итклән геел уга олн-зүсн марһаст орлцад диилвр бәрнә Олн-зүсн дипломс, һашгуд энүнд ил герч болжана. Зурһадгч классин сурһульч Алтан Гаряев һурвн жил дарандан гиигн атлетикар негдгч орм эзлжәнә. Энүнәс нань кесг дәкч»Баһ наста бөк бәрлдәч» гидг марһана призер болсмн. Кезә нег цагт эн залд Зая-Пандитан санлд нерәдгдсн греко-римск янзар бөк бәрлдәнә танһчин турнир чигн давдг бәәсмн.

Энян Ольга, Хавтхан Анатолий