Элстд «Снежная королева» нертә мюзикл тәвгдв
Хотл Элст балһсна концерт залын тәәз деер дару-дарунь соньн концертмуд, наадд тәвгддг болв. Эн өдрмүдт олн мана хәләһәчнр «Снежная королева» нертә мюзикл үзж чадв.
Ганс Христиан Андерсена бичсн тууляр тәвгдсн мюзикл олн-әмтнә оньг авлв гиж келх кергтә. «Снежная королева» туулиг бидн бичкн цагасн авн меднәвидн. Мюзиклин режиссер хальмг танһчин ачта үүлдәч Аркадий Манджиев, бииһин халхар көдлсн Хальмг танһчин ачта артистк Александра Манджиева, танһчин государственн хоорин артистнр, мана симфоническ оркестр олн-әмтиг, тер дотр мюзикл хәләхәр ирсн бичкдүдиг кезәнг цагур эргүлж, йоста илвтә орн-нутгт күргж, билг-эрдмәрн байрлулж чадцхав.
Зурц болһиг заалд суусн әмтн альхан ташч байртаһар тосчав. Мюзиклд һол дүрмүд наадсн хальмг танһчин ачта артист — Мерген Ким, дууч — Эвелина бичкн, өкәр билгтнр нань чигн дүрмүдиг үзүлсн артист болһн седклән өгч даалһсн дүр болһиг соньннар үзүлх арһ хәәцхәв. Эн йовдл олнд байр үүдәсн деерән дорас өсч йовх баһчудт сән сурһмж өгхнь лавта.
Хойр өдриг эргцт олн хәләһәчнр эн ке-сәәхн мюзикл хәләж, чикнә хужран ханһаж, седклән байрлулж чадцхав.
Нәдвидә Тамара, Очра Сергей
