Ноха гертән эс гиж герин һаза бәржәх улст селвгүд өгчәнә

Ода болхла ноха бәрх саната болн нохан кичг хулдж авх саната улст олз-туста сүв-селвг өгх зура бәәнә. Иим керг амр биш. Ноха гертән эс гиж герин һаза бәржәх улст иим селвгүд туста болх гиж санжанавидн.

Тадн гертән ноха авад өскх сана зүүвт. Энтн сән керг, иим улсиг күндләд дөннх кергтә. Бичкн нохан кичг авсн улс иим нохаг дару дарунь малын эмчин хәләврт орулх зөвтә. Тенд малын эмч кергтә тәрюл кеж чадх. Болв нохан кичг авсн улс иим тоолвран сәәнәр ухалж авсн болхий? Ноха авсн улс ик даавр зүүжәнә, әмд юмнд цаглань хот өгх кергтә, талдан чигн килмж тусхах зөвтә болжана. Елена Посвежимован келсәр, ик нохасиг бәрхд невчк амр. Эднә ноос самлхд, чикинь арчхд ик цаг керг уга. Бичкн ик нооста нохасиг хәләхд күнд өдр болһн эдниг самлх болн уһах кергтә болна. Нег үлү нохан тохм болһниг сәәнәр медж онц килмж тусхахла сән болна. Нохасин шүдинь, чикинь болн ноосинь оньдин шинжлж хәләх кергтә болна. Тер мет специалистнрас селвг авхла бас үлү болшго. Ямаран тохма ноха эднә өрк-бүлд ирлцхинь бас медж авх кергтә.

Кемр тадн бичкн чи-хуа-хуа эс гиж мастифф тохма ноха авхла, эдниг хәләж асрхд жанһрта толна. Нохад заквр күцәдгинь дасххинь өмн, нохан зангинь сәәнәр медж автн. Елена Посвежимован тоолврар, бичкн ноха авхла, энтн нилх кү хәләснлә әдл болжана. Нохан орм, альд хот уудгинь болн һаза һардгинь зааж өгх төр тәвгднә. Энүнә төлә цаг кергтә болна. Нег үлү, кедү мөнг һархинь бас урдаснь тоолж автн. Бичкн нохад дала мөнгн һарна.

Специалистнрин тоолврар, ноха эврәннь эзән сәәнәр медж, өсхләрн йосндан ижлдж одна. Тегәд иим селвгүд таднд олз-туста болх гиж санжанавидн.

Ээнән Делгр