Насни дигт күрәд уга бичкдүдин комиссин сүүр болв
Өнчн бичкдүдиг болн жирһлин күнд бәәдлд туссн көвүд-күүкдиг эмчин хәләврт орулһна, дотр-дундын кергүдин болн эрдм-сурһулин заллтин хамцу үүлдвр. Энүнә тускар насни дигт күрәд уга кергүдин танһчин комиссин сүүрт тодрхаһар келгдв.
Сүүр хойр дәкж ямаран учрар хооран саагдсн тускар танһчин комиссин ахлачин дарук Раиса Дякиева цәәлһвр кев. Одахн Элст балһснд эрдм-сурһулин халхар шинжләчнрин федеральн баг көдлмшән төгсәв. Эн халхин зака күцәлһнә программар насни дигт күрәд уга бичкдүдин эрдм-сурһулин халхин федеральн закана кемжәлгч документмүд бүрткж хәләгдв. Энүнә ашар Рособрнадзор комиссин бүртклһнә тооца хәләв.
Комиссин сүүрт һурвн төрәр күүндвр кегдв. Тер тоод эрүл-менд нертә келн-улсин төсв күцәлһнә йовудын туск төр хәләгдв. Жирһлин күнд бәәдлд туссн бичкдүдин болн өнчн көвүд-күүкдин жил болһн болдг диспанзеризац Әрәсән правительствин бүртклһнд бәәнә. Эн жил эн халхар күнд төрмүд хаһлх кергтә болв. Ода мана танһчд иим зурһан зун йирн бичкдүд бәәнә. Болв сентябрин нег шинд эднәс зуг зурһан зун далн атвн көвүн-күүкн эмчин хәләврт орв. Эннь йирн нәәмн процент тогтав.
Танһчин бичкдүдин больницин ах эмчин дарук Антонина Джанджиеван келсәр, Эн жил бичкдүд эмчин хәләврт медицинск даатхлһна мөнгәр кегджәнә. Тегәд цуг көвүд-күүкд эс гиж зун процентнь дипансеризацд орх зөвтә. Эндр өдрт эмчин хәләврт зурһан зун һучн дөрвн бичкдүд орсна тускар мөнгнә цаасн ирв. Эднәс түрүн девснгд дөврн зун хөрн йисн күн орв. Хойрдгч девснгд хойр зун шаху бичкддүт орх, тер мет талдан һазрас йисн көвүн-күүкн эмчин хәләврт орх зөвтә.
Сүүрт дәкәд нег төрәр күүндвр кегдв. Ода нәәмн школ-интернатд эмчнр болн дунд медицинск персонал дутжана. Райодт шишлнг эмчнр, тер тоод психиатрмуд, педиатрмуд дутжана. Тер тмет бичкдүдиг эмәр тетклһнә төр бас хәләгдв. Иргч хойр минһн арвн дөрвдгч жилд эм хулж авхин төлә мөнг йилһж өгх селвг танһчин эрүл-менд харлһна министерствд өггдв. Эрүл-менд харлһн нертә келн-улсин төсвәр диспансеризацин хойрдгч девснгин зура күцәгджәхш. Элст балһсна болн Городовиковск района дотр-дундын кергүдин органмудын болн эрдм-сурһулин заалтин хамцу көдлмшин йовудт эн туст бәәдл чикржәнә. Сентябрин нег шинд кесн то-дигәр хойр зун негн көвү-күүкн шишлнг тоод бәәнә. Тавн жил хоорна эднә то дөрвн зун күүнд күрчәсмн. Тер мет бичкдүд дунд зака эвдсн йовдлмудын то баһрв.
Хальмг танһчар МВД-н әнгин ахлачин дарук Бадма Лиж-Горяевин келсәр, сурһульчнр дунд зака эвдсн йовдлмуд һучн хйор дундур процентд баһрв, оютнр дунд далн тавн процентд. Тер мет күндәр зака эвдсн йовдлмудын то дөчн процент баһ болв. Хамцу көдлмш сән ашта болжана. Ода бичкдүд сөөднь олна һазрт баһар цулргна.
Жирһлин күнд бәәдлд туссн бичкдүдиг эрт илткж авлһна көдлмш бүрдәх селвг муниципальн комиссьмүдт өггдв. Эрдм-сурһулин заллт болхла тавдгч-йисдгч классмудын сурһульчнр школдан яһж оржахинь бүрткх зөвтә. Зака эвдсн йовдлмуд баһрулхин төлә бичкддүиг спортар соньмсулх кергтә. Энүнә төлә школмудт спортивн секц олар секх төр тәвгджәнә. Ода иим секцд хойр минһн бичкдүд оржана.
Элст балһсна эрдм-сурһулин заллтин ахлач Ирина Минкееван келсәр, жил болһн Элтин администрац керг-үүлдврмүд темдглж авна. Тер мет нани дигт күрәд уга бичкдүдин комиссь болн дотр-дундын кергүдин әнг хамцу керг-үүлдврмүд күцәнә.
Танһчин комиссин һол күцлнь — сурһульчнр дунд болн насни дигт күрәд уга бичкдүд дунд зака эвдсн йовдлмудын то баһрулһн болжана.
Батан Санжирма, Ирчин Алексей
