Москвад Хальмгин малчнр сән гисн малан үзүлжәнә

Эндр Москва балһснд Алтн намр нертә агропромышленн цугәрәсән арвн дөрвдгч һәәхүл секгдв. Һәәхүлмүдин цутхлнгин Тохма мал нертә павильонд эндр хальмг тохма өвртә бод мал болн хальмг тохма хөд авч ирв. Тер тоод Хальмг танһч хамгин сән тохма бүрүс болн хальмг, грозненск, каркульск болн советск мекринос тохма хөд үзүлжәнә. Эдниг танһчин нүүрлгч селәнә эдл-ахун арвн предприять, тер тоод “Степной”, “Плодовитое” СПК-с, “Адуч” КФХ, “Харба”, “Кировский” эдл-ахус болн “Церн” нертә крестьянск-фермерск эдл-аху хамгин сән малан Москвад авч одв. Һәәхүл байрин бәәдлд секлһнд Әрәсән премьер-министр Дмитрий Медведев орлцх зурата. Хальмгин делегациг толһач Алексей Орлов һарджана. Һәәхүл октябрин арвн дөрвн күртл болх.