Хальмг танһчин саата күүкд улс медицинск сән дөн авх
Эрүл-менд харлһна халх шинрүлһнә программ хойр жилдән күцәгдснә ашт мана танһчд ик сольвр болжана. Тер тоод саата күүкд улст дөн күрглһнә халхар бәәдл ясрв. Элст балһснд перинатальн цутхлнг секгдв. Энүнд тавн зун граммас баһ чиннүртә нилхдүдт килмж күргхин төлә өдгә цагин некврлә ирлцәтә оборудовань бәәнә. Эмчнрин тоолврар, ода иим цутхлнгд күүкд улс эмнүлх орна то диглж авх кергтә. Эн халхар танһчин райодын улсин төлә бас сән таал бүрдәгдх төр тәвгджәнә.
Өдгә цагт Хальмг танһчин цуг района больницмудт гемтә улсин орм хасгдсн бийнь, өдр-сө уга көдлдг акушерск пунктмуд көдлжәнә гиж танһчин ах акушер-гинеколог Инна Бадмаева келнә. Эннь бас учрта, юнгад гихлә, саата күүкд улс Элст балһсна төрлһнә герт кергтә медицинск дөн авхин төлә иим хүврлт кегджәнә. Хөөннь иим күүкд улс өдгә цагин некврлә ирлцәтә оборудовань көдлжәх перинатальн цутхлнгд дөн авч чадх. Саата күүкд улс хотл балһснд ирх зөвтә, болв экин болн нилхин эрүл-менд сән болхмн.
Инна Бадмаеван тоолврар, эннь хамгин һол төр болжана. Танһчин ах акушер-гинеколог Инна Бадмаеван келсәр, эн халх хүврүлһнә ашт селән һазрт саата күүкд улсин ормин һучн нәәмн процентнь үлдх, Элст балһснд тәвн һурвн процент иим орм тогтах. Энүнә учрин тускар келхлә, саата күүкд улсин кесгнь гемтнә, тегәд эднд перинатальн цутхлнгд кевтх кергтә. Райодт болхла акушерск пунктмуд урдк кевәр көдлх гиж Бадмаева темдглв.
Удл уга перинатальн цутхлнгд капитальн ясвр эклх. Энүнә төлә найн дөрвн сай асрлнг мөнгн йилһж өггдв. Иргч жилин март сарас авн энд саата күүкд улс ирәд, бийән эмнүлж чадхмн. Бичкн чиннүртә төрсн нилхд килмж күрглһнә шин оборудовань энд углж тәвгдхмн. Инна Бадмаеван келсәр, эн жиләс авн нилх бичкдүдт он оньг тусхагджана. Болзгасн урд һарсн бичкдүдиг харсж авх кергтә болжана. Тер саамд Лаганя района больницд поликлиникин, бичкдүдин, хирургическ болн терапевтическ әнгүдин гермүд шинрүлгдж ясгдв.
Энүнд тәвн сай мөнгн һарв. Тер мет ода энд төрлһнә әнг ясхин төлә немр мөнгн кергтә болжана. Дәкәд болхла төрлһнә әнгд бас шин аппаратмуд тәвгдхмн. Лаганя района больницин ах эмч Герман Бадма-Халгаевин келсәр, оборудовань хулдж авхин төлә дөчн йисн сай арслнг ирв. Энүнәс зәрмнь төрлһнә әнгд углж тәвгдх. Тер мет бачм чинртә медицинск дөн күргдг маши болн мамограф күләжәнәвидн. Удл уга консультативн цутхлнг экләд көдлх, Көдләчнр кергтә, эрүл-менд харлһна министерствд цаас бичж. Ода уролог, терапевт болн эндокринолог кергтә. Өдгәц агт специалистнр сурһуль дасжана.
Иргч жилд Ик-Буурла болн Приютненск райодын больницмудт сестринск хәләврин әнг көдлх. Энд саата күүкд улсин шинжлж хәләхмн. Көтчнрә района больницд болхла межрайонн акушерск стационар секгдх. Иим кеәвр көдлхлә, танһчин әмтнд сән медицинск дөн күрггдхнь лавта. Энүнә төлә эрүл-менд харлһна халх шинрүлһнә программ ода үүлджәнә.
Ээнән Ольга, Колдан Церн
