МЧС-ин сурһуль болв

Эндр Әрәсән гражданск харслтын найн негн жилин өөнлә гражданск харслтын цугәрәсән дасхл болх. Иим сурһулин керг-үүлдврин һол күцлнь — һардачнрин дамшлт өөдлүлһнә, бачм чинртә бәәдл тогтсн цагт олн-зүсн ведомствсин болн церглтсин белдвр бүрткж хәләлһн болжана.

МЧС-ин сурһулин домгар Элст балһснд цевр усна савд эвдрлт учрад, хлорын сурвлжн эдлврәс һарч. Ода мана танһчд цевр усна ик сав ик чинртә обьектин тоод оржана. Эвдрлт хлораторн цехд учрв. Энүнд цевр уснд хлор орулж цеврлгднә. Энүнә хөөн уудг усн хотл балһсна гермүдт өггднә. Энд болсн эвдрлтәс көлтә нег күн әмнәсн хаһцв, хойр күн шавтв. Энд көдлжәх специалистнр харсачнр болн эмчнр иртл эврәннь чидләрн ясврин көдлмш кежәнә, әмт харсж авчана. Шишлнг харслһна хувц өмссн көдләчнр хлор аһарт һарһшгоһар көдлжәнә.

Элст балһсна цевр усна участкин ахлач Герман Надеевин келсәр, энд учрсн аюлын хөөн ясврин көдлмш кегджәнә. Хлорын сурвлжн тасрж, хлор хадһлдг контейнерас хлор асхрж. МЧС-ин көдләчнрлә хадман аюлла ноолджанавидн. Хлор әмтн әәмшг учрашго.

МЧС-ин дежурн әнгд цевр усна учатскас арвн негн часла зәнг ирв. Түүмр унтралһна гарнизона команд тер дарунь аюл болсн һазрт һарч йовцхав. Харсачнрин ирхин өмн Калмэнергон специалистнр электрокүч өглһнә залһлда унтраж. Полицин көдләчнр болхла эргдн аһу бүсләд харжана.

Хальмг танһчар Әрәсән МЧС-ин заллтин ахлачин дарук Андрей Таросян келсәр, сурһульд танһчин МВД-н, медицина катастроф, бачм чинртә медицинск дөн күргдг церглтын элчнр, Криосервис болн СПАС-сервис харслһна бүрдәц ут-тоодан хөрн хойр күн көдлжәнә. Нәәмн техник бәәнә. Тәвсн цуг даалһвриг эдн цүцәж чадх. Эднә үүлдвр сән гисн темдгәр үнлдгдв.

Жил болһн иим сурһульд аварийн харслһна бүрдәц шунмһа кевәр орлцна. Иим бүрдәц хойр минһн доладгч жилд тогтагдв. Хамцу кеәвр ни-негн көдлсн ашт аһарт нгевчкн хлор һарснь әмтнә эрүл-м ендин халхд әәмшг учрашго.

СПАС нертә аварийн харслһна бүрдәцин һардач Владимир Хабуновин келсәр, энд көдлжәх цуг церглт МЧС-ин специалистнрин һардврт цуг даалһвриг сәәнәр күцәжәнә. Асхрсн хлор болн бузрдсн һазр цервлгдәд, әәмшг учрашго.

Ик чинртә болн әәмшгтә обьектмудт иим сурһуль бамч чинртә йовдлд яһж көдлх дамшлт өгнә. Кемр йосндан обьектд аюл учрхла МЧС-ин көдләчнр харслһна көдлмш кехдән белн бәәнә.

Батан Санжирма, Эрнжәнә Эрднь