Олн үртә өрк-бүлмүдт һазрин участк өгчәнә

Әрәсәд олн үртә өрк-бүлмүдт һазрин участк өгчәх регионмудын тоод Хальмг танһчд орв. Һурвн жилин эргцд Элст балһсна долан зун өрк-бүл гер бәрх һазр авв. Инвалид улс иим һазр хамгин түрүнд авх зөвтә. Зуг эдн ода эн туст күнд бәәдлд тусв.

Олн үртә Дорджиевихна өрк-бүл хотл балһсна деед-ар үзгт бәәх Кленовая нертә уульнцд һазрин участк хамгин түрүн авч. Ода герин тосхлт төгсхдән өөрдж йовна. Герин эзн күүкд күүнә келсәр, ода чигн кех көдлмш дала. Бичкн Даяна эврәннь хораһан ик кезәнәс авн күләжәнә. Ода баһ наста өрк-бүл һурвн хората элгн-саднань патьрт бәәршлжәнә.

Ирина Дорджиеван келсәр, эврән герән тосхжанавидн. Күн болжана. Аавльтаһар хамдан чалсарн толсхжанавидн. Давсн жилд герин ул тосхв, ода герин эрсн босхгдв.

Һазрин участк авсн бәәрнд хату девскртә хаалһ, электрокүчн болн газ уга болв чигн, иим көдлмш эклхин бәәрн әмтн күләжәнә. Эднә келсәр, хамгин һол төрнь — эврә гертә эдн болв.

Тер мет инвалид бичкдүдтә өрк-бүлмүд бас һазрин участк авчана. Тер саамд хамгин түрүнд һазрин участк авх иим улс күн бәәдлд тусв. Элст балһсна бәәрн күн Арнзл Болдырев бичкнәсн авн инвалид. Һазрин участк авх зөвин тускар зун эн жилин июль сардж медв. Государствин халхас иим белг кеснд икәр байрлв. Тер дарунь хотл балһсна администрацд ирлцнһү эрлһ орулж өгв. Болв һардачнр тал ирхлә, эврә герин туск зура эвдрв. Инвалид улс гер бәрхин төлә һазрин участк эврән хәәж авх зөвтә. Инвалидн тергәр йовдг күн яһж һазр хәәж авхмб?

Арнзл Болдыревин келсәр, инвалидн тергәр йовжахас көлтә эврән йовж чаджахш, эк-эцкнь көгшн. Тегәд эн төр хаһлхд күнд болжана.

Энүнлә әдл улс дала. Эдн эврән һазрин участк хәәж чадшго. Зәрм инвалидмуд хотл балһсна администрацд одх биш, гертәсн һарч чаджахш.

Арнзл Болдыревла әдл эрүл-менднь му болад эврәннь көләрн йовж чаддго улс дала. Тер саамд государственн юридическ бюрод долан инвалид ирәд эрлһ орулж өгч. Эднәс негнь эврәннь зөвән зарһд харсхар шиидв. Ирлцнү эрлһ зарһд бичхд юристнр энүнд нөкд болв. Әрәсәд инвалид улсин социальн харслһна туск федеральн закаһар иим улс хамгин түрүнд һазрин участк авх зөвтә.

Государственн юридическ бюрон директорин дарук Арслнг Эрднеевин келсәр, эн күн өрхл жилдән администрацд һазрин участк авхар чеерүдт зогсжана. Удан күләдг арһ уга болжана. Ода бәәдг гернь дегд уутьхн. Тегәд зарһд эрлһ бичж өгчәнә.

Хотл балһсна администрацд келсәр, иим төр бәәнә. Инвалид улс һазрин участк эврән хәәж авхин төлә дала цаг болн чидл кергтә. Мэрйин һазрин төрин әнгин ахлач Чингис Дарбаковин келсәр, иим бәәдл зөөрин министерствас цуг зөвиг муниципалитетмуд өгснәс иштә тогтв. Энүнә келсәр, ода һазрину частк өгх һазриг зургт цокж авад, инвалид улст үзүлхин төлә хазнас мөнгн йилһж өггджәнә. Тиигхлә иим улс сул һазрин участк үзж чадх.

Мэрйин һазрин төрин әнгин ахлач Чингис Дарбаковин келсәр, эн төриг дигтә даратаһар кех санан бәәнә. Нааран ирсн инвалид улс хотл балһсна зург үзж чадх. Тиигхлә эднә төр хаһлгдх. Иргч жилд иим программ күцәхин төлә мөнг зуралх кергтә.

Элст балһсна һардачнр иим бәәдләс яһж һархин тускар ухалжахла, инвалид улс кезә эврәннь һазран авхан меджәхш.

Ээнән Ольга, Эрнжәнә Эрднь