Машидт бичкдүдиг авч йовхла эрк биш шишлнг суудл бәәх зөвтә
Бичкдүдән хәләвр уга үлдәсн эк-эцкнр чанһ засгла харһулгдх. Бичкн көвүд-күүкдиг гертнь, уульнцд эс ги ж машинд һанцхараһинь эк-эцкнр үлдәшгон төләд Государственн Хүүвин депутатнр шин зака белджәнә. Эк-эцкнриг яһж засгла харһулхин тускар күүндвр кегдх. Тер саамд машидт бичкдүдиг авч йовхла шишлнг суудл кергтә. Зуг эн зокалыг зәрм жолачнр күцәжәхш.
Эн зургиг бачм чинртә кеәвр цокж авч. Нег част тәвн дуунад йовж йовсн машин бетонн эрс цокв. Энүнә ашт бичкн пассажирмуд дуралһад кесн машинд йовсн наадһа күндәр шавтв. Эдниг әәмшг угаһар йовлһна бүсәр бүслсн билә. Тер бийнь эдн олн-зүсн күнд шав авцхав. Иим зеткртә йовдл оньдин учрна. Бичкдүдиг машинд шишлнг эв-арһин нилчәр әәмшг угаһар авч йовх кергтә гиж ГИББД-н көдләчнр кесг дәкж саглулсн бийнь, олн әмтн эднә селвгиг оньгтан авчахш. Смоленск балһсна бәәрн күн Виктория келсәр, тавн наста бичкдүд әәмшг угаһар йовлһна бүс олзлж чадхин тускар сонсж.
Иим зәнг тас худл гиж маши залачд ГИББД-н инспектор келв. Зун һучн долан сантиметрас баһ нурһта бичкдүд әәмшг угаһар йовлһна саглулгч бүс олзлх зөвтә. Эн саамд болхла зака эвдсн йовдл болжана. Зун хөрн нәәмн сантиметр нурһта күүкн шишлнг эдәс кесн машинд кү чанһ кевәр бәрдг шишлнг эв-арһ олзлх кергтә. Хаалһд зеткртә йовдл учрхла, бүсин дотр бәәх иим эд кү чанһар бәрж бүсәс сул тәвхш. МВД госавтоинспекцин көдләч Игнат Куцеповин келсәр, бөдүн улс олзлдг бүс өрч деерәһүр һарна, бичкдүдт болхла эн эв-арһ дигтә чирәднь ирж тусна. Кемр шишлнг эв-арһ олзлхла, иим бүс мел дигтә болх. Иим кеәвр тадн Әрәсән зака эвджәнәт. Административн ял тавн зун арслнг тогтажана.
Болв специалистнрин тоовлрар, хамгин сән эв-арһ — автосуудл болжана. Иим суудл бичкдүдин нас болн нурһинь тоод авч хулдж авх кергтә. Ода иим тавн зүсн суудл бәәнә. Әәдрхн балһсна жолач Александр иим эв-арһ шишлнг магазинд хулдж авч. Энүнд хулдачнр нөкд болж. Энүнә келсәр, дөрвн нас күрәд уга бичкдүдиг машинд авч йовж болх. Әәдрхнә маши залач Александрин келсәр, ода эн халхар хаһлх төр уга. Ода энүнә үрн һунта. Нег жилсә авн эцктәһән машинд йовад дасв. Шишлнг суудл магазинд хулдж авсн бәәж. Тенд хулдач сән селвг өгв. Иим суудл дегд үнтә биш.
Нилх бичкдүдиг болхла машинд шишлнг дүүжнгд авч йовх кергтә. Бичкдүдиг һартан бәрж машинд йовхла әәмшгтә. Юнгад гихлә, генткн машин цоклдхла, бичкн кү һартан бәрж болхш. Иим кемд цоклдсн күүнә цогцин чивхнь тавн зурһан холванд икднә гиж специалистнр келнә. Статистикин то-дигәр, хаалһд зеткртә йовдлын ашт бичкдүд хойр холванд икәр әмнәсн хаһцна. Автосуудл олзлхла шав авсн йовдл кесг холванд баһ болна. Автоинспектор Игнат Куцеповин келсәр, эн жилин долан сард дөчн тавн зеткртә йовдлын ашт һурвн бичкдүд әмнәсн хацһв, тәвн негнь шавтв. Энүнәс ик зунь машинд йовж йовад шавтна. Өдр болһн Элст балһснд иим хөрн зеткртә йодвл учрна. Зәрмдән энүнә ашт бичкдүд күндәр шавтна.
Харм төрхд, зеткртә йовдл учрад, бичкдүд шавтсна хөөн, бөдүн әмтн һундна. Болв зака эвдлго йовхла иим йовдл учршго болжана.
Чучян Валентина, Ирчин Алексей
