Мана Ик сурһуль эврәннь оютнрин төлә шишлн мастер-классмуд давулжана

Эн өдрмүдт мана Ик сурһуль эврәннь оютнрин төлә шишлн мастер-классмуд давулжана. Энүнд гүн медрлтә багшнр дамшлтарн дорас өсч йовх баһчудла хувалцжана. Эн керг-үүлдврт һурвн минһн һар оютнр орлцх зурата. Мастер-классмудт эсвин, физикин, химин, орс келнә болн нань талдан багшин эрдм дасчах оютнр орлцвһ Эндр болхла мана ик сурһульд хальмг келнә багшнр мастер класс өгчәнә.

Тавдгч курсин оютн Тамара Босхомджиева ик сурһулян чиләһәд төрскн Манцын Кец селәнд көдлхәр бәәнә. Цөн сар болад күүкн эклц классин багшин диплом авх. Тегәд эн мастер-классмуд энүнд олз-туста болхнь маһд уга. Тамара Босхомджиеван келсәр, бичкнәс авн багш болхар седлә. Тегәд, энд авсн медрл цааранднь эврәннь көдлмштән орулх саната. Келхд, нег сарин туршарт хальмгин государственн университетин оютнр иим керг-үүлдврт орлцж чаджана.

Элст балһсна 4-гч тойгта школын багшнр эн керг-үүлдврт шунмһа кевәр орлцжана. Мастер-классмудт гүн медрлтә, ик дамшлтта багшнр баһчудт сүв-селвгән өгәд, багшин эрдмин тускар келж өгнә. Эн багшнр эрдм-сурһулин халхар кесг жилдән көдлж йовна. Жил болһн хальмгин университетин оютнр Элст балһсна школмудт орад, багшин дамшлт хоршана.

Ут тоодан иим мастер-классмуд хотл балһсна хамгин сән найн шаху багшнр давулх. Энүнә йовудт эсвин, физикин, химин, орс болн хальмг келнә, цогц батрулһна, туужин болн нань талдан багшин эрдм сурчах оютнр медрлән өөдлүлж чадх.

Келхд, эн керг-үүлдврин йовудт оютнрт шишлн анкет өггдсн билә. Энүнд тәвсн сурврмудт көвүд-күүкд хәрү өгв. Оютнрин йирн шаху процент тиим мастер-классмуд кергтә гиж темдглв. Энүнд баһчуд бийдән кесг соньн болн олз-туста тоот шингәж авсмн.

Шаран Баира, Жамбин Дмитрий