Макулатур цуглулад бичкдүдт дөн күргжәнә

Хальмг танһчд “Макулатур цуглулад — бичкдүдт дөн күрг” нертә керг-үүлдвр цаарандан болжана. Энүнд министерствс-ведомствс, организацс, онц арһлачнр болн хотл балһсна бәәрн улс орлцж чаджана. Тер мет хамгин олар макулатур цуглулж авсн школмуд болн классмуд дунд дииләч йилһрх. Энүнәс хоршасн мөнгн бичкдүдин поликлиникин эргндк аһу кеерүлж сәәхрүлһнд йовулгдх.

Өдгә цагин сурһульчнр эврәннь эк-эцкнриннь пионерск цагин зангшал сергәж тодлв. Элст балһснд макулатур цуглулад — бичкдүдт дөн бол нертә буйнч седклин керг-үүлдвр болжана. Энүнд Элст балһсна цуг школмуд болн зәрм райодын эрдм-сурһулин учрежденьс орлцжана. Хот л балһсна арвн доладгч школын сурһульчнр хамгин түрүнд кесг тонн макулатур цуглулж авв.

Элстин арвн доладгч школын сурһульч Мария Цыбулина келсәр, мана школ олн-зүсн керг-үүлдврмүд орлцна. Жил болһн баһ тетквртә өрк-бүлмүдь дөн күрглһнә керг-үүлдврт сурһульчнр орлцна.

Көвүд-күүкд иим керг-үүлдврт шунмһаһар орлцад, хамгин олар макулатур цуглулх саната гиж багшнр келнә. Эднә цуглулж авсн макулатур школын һаза чиннүрдәд, иим материал авдг шишлнг пунктд йовулжана. Цаарандан энүг эд-бод кехмн. Буйнч секдлин керг-үүлдврин ашар дииләчнр болн призерммуд йилһрхмн.

Элтин арвн доладчг школын директорин дарук Баирта Лиджиеван келсәр, иим керг-үүлдвр кергтә. Сурһульчнрт сән сурһмж өгнә. Энүнд негдгч классас авн арвн негдгч класс күртл цугтан орлцв. Макулатур ноябрин хөрн күртл цуглулх. Эднә цуглулсн цаас ода багтжахш, энүг орулж өгх кергтә.

Иим керг-үүлдвр бүрдәж давулх седвәр Хальмг танһчин бичкдүдин зөвин элч орулж өгсмн. Эн ведомствин аппаратын специалистын темдглсәр, "Макулатур цуглулад — бичкдүдт дөн күрг" нертә керг-үүлдвр буйнч седклин керг болсн деерән, экологическ керг-үүлдвр болжана. Хуучн цаас цуглулад, хөг-богас цеврлсн деерән, цаас кеж һарһлһна производствд мод әрвнәр олзлх арһ өгчәнә.

Хальмгин күүнә зөвин элчин аппаратын ах специалист Эльза Сакаеван келсәр, энүнд хоршасн мөнгәр инвентарь хулдж авх зура бәәнә. Тер тоод сандл, хувц өлгдг вешалк авх. Үлдсн мөнгн бичкдүдин поликлиникд өггдх. Райодын сурһульчн бас эн керг орлцжана. Эдн вэрәннь көлгн-күчәрн макулатур авч ирв.

Эн керг-үүлдвр эн долан хонгин чилгч күртл болх. Энүнд танһчин цуг министерствс-ведомствс, предприятьмуд, онц арһлачнр болн хотл балһсна бәәрн әмтн орлцж чаджана. Макулатру цуглулад — бичкдүдт дөн күрг!

Бевина Мергн, Хулхачин Николай